Ka elekshon sha Khasi bad Jaintia District Council, kaba dang shu pynlong shen, ka pyni ia ki dak kiba sniew shibun, na bynta ka seng Congress bad kumjuh ia ka seng HSPDP ruh, ha kaba kitei ki seng, ki la jan duh jait syndon, namar ba ka Congress kam shym la jop wat tang uwei u dkhot ha Khasi District Council bad ka HSPDP, ka jop tang uwei u dkhot, katba ha Jaintia hills, ka Congress, ka la jop tang ha ki lai 3 tylli ki Constituency bad kitei ki dak ki long kiba i ngiew bha, ia ka lashai jong kitei ki ar tylli ki seng, ha kaba na ki 58 tylli ki Constituency, ki don tang 4ngut ki MDC ha baroh ar ki Council.
Ka HSPDP, lada ka dei ba kan khylliap lama noh ialade, kumta ka dei ban shim noh mar mar ia katei ka rai bad ba kan ia tylli lang noh kawei bad ka seng VPP, lane bad ka UDP, kiba dei ar tylli ki seng trai ri, kiba dang sah kyrteng, hynrei lada kan iai pyneh jubor, kumta katei ka seng kan sa kut noh shen dalade hi.
Ka jingiatreilang jong kitei ki ar tylli ki seng sain pyrthei ha ka sorkar synrop NPP, la iohi, kumba ka dei kawei na ki daw bah, kaba la pynjlep ia u paidlang ka Ri Khasi Jaintia, namar ba u sing, u don ha ka sorkar synrop MDA, katba ka kti ruh, ka don ha ka kynhun NPP ha Khasi District Council.
Ka Congress, ka dei ka seng heh jong ka India bad kaba don 100ngut ki MP jongka ha Lok Sabha, ka la dei ban duriap bha, ia la ka jong ka bynta kum ka seng sain pyrthei, da kaba kan sdang naduh tyllong, ha kaba pynkhie im ia katei ka seng bad katei ka bynta, kan dei ka jingkut jingmut kaba wan naduh na Delhi, ban khyllie biang ia ki riew ieid seng, kiba don ha ki shnong ba kyndong tam bad ba kin don ruh ki jingialang ialum, ki jingiakren bad ki mat kiba kongsan, kiba iadei bad ka imlang sahlang, ka sain pyrthei ruh kumjuh bad katei kan pyni sha kito kiba ieid ia katei ka seng, ba ka don ka jingkut jingmut ban trei ia ka bha ka mat jong u paidlang ka jylla.
Ka por kam ap satia ia ka seng Congress, ba kan pynkhreh ia ka elekshon MLA 2028 bad ka jingsdang, ka dei ban long mynta hi, khlem da ap shuh ia u snem 2026 bad ka donkam eh, ba ki heh jong ka seng, naduh ki nongialam ba ha khlieh na Delhi, ba kin leit sha ki shnong ki thaw bad ba kin shim khia ruh ban iakren ia ki mat kiba ktah ia ka eh ka shon jong u paidlang ka jylla hi baroh kawei bad kitei ki mat, ki don bun bah, lada dei ha ki iing baduk lane ki skhim PMAY, lada dei ha ka koit ka khiah, da kaba kin iit bniah ia ka health insurance bad wat ia kiwei ki kam pynroi, kum ia ka umbam umdih, ka surok bad ka skhim khaw reshon bad wat ia ka khaii pateng sha Bangladesh.
Phi don ban ong eiei?