Shah kyndang ka Mawshun na surok bah sha surok khlaw

Ka Mawshun, kam dei shuh ka shnong rit jong ka thain Riwar Mihngi, kaba don ha Pynursla Block; hynrei katei ka shnong, kan sa kylla nongkyndong noh shen bad ki nongbah khlieh, ia ka lynti thymmai, ki long U MLA jong katei ka thain, U Bah Prestone Tynsong ha ryngkat bad ki enjiniar ka NHIDCL, kiba la shim ia katei ka rai, ban kynriah noh ia ka surok bah sha ka jingjngai kaba 1 Kilometre antad jong katei ka shnong bad ban pynkylla surok khlaw noh, ia katei ka surok bah kaba mynta.

Baroh ki briew, ki donkam surok bad la iohi, ba ki don bun bah kiba ring surok, haduh ha phyllaw iing, ba kan suk bad duna bailut, ka leit ka wan, ka kit ka bah bad wat ha ka pang ka shitom; hynrei katei kam jia satia, na bynta ka shnong Mawshun, namar ba, ynda la dep, katei ka surok bye pass, kumta ki nongshong shnong, kin hap leit beh kali, ban ia leit ia wan, sha katei ka surok bah, kaba thymmai.

Kam dei tang katta, la iohi shuh, ba kitei ki enjiniar ka NHIDCL, ki dei ki enjiniar khynnah suda, hynrei, la ailad ia ki, ba kin peit ia kat katei ka surok bah bad la iohi ruh, ba ha khlieh jongki, kam don satia ka jing pyrkhat ia ka bha ka miat jong ki paidbah, hynrei ka thong jongki, ka dei beit tang ban pyndep mardor ia ka surok bad ka dei na katei ka daw, ba ki thok pyllein pyllein, da kaba ong, ba katei ka lain thymmai, kam don umbam umdih satia.

Ha ka jingleit jurip jong ki ophisar ka East Khasi hills District lem bad ki bor shnong, la lap ruh, ba ka jingiaid jong katei ka surok, ka long kumba leh khnang, ha kaba la jied ia ki jaka, kiba ki sngew dei ne ki sngew iahap bad katei ka nang pynjngai ia ka leit ka wan ki paidbah, ha kaba ka dur, ka long kum ka dur jong u “U”.

Ngin dang ia peit, ia kaei ka ban jia shakhmat, hynrei, katei ka kompeni, ka la pynjot, ka la pynduh ia kiba bun ki jaka jong ka thain hi baroh kawei bad kam lah ban teh lakam ia ki nongbylla jongka, lane ki kontraktor bad ka surok sha katei ka thain, kam long shuh kaba bit ban iaid kali, ha kaba wat ki trok ruh, ki dang iaid husiar bad ha katei ka dur, katno tam, kan jia ia ki kali rit lane ia ki kali jong ki riew paidbah.
Ka Mawshun, ka dei ban pyrkhat ia ka lashai jongka, namar ba lada ka kwah surok ha shnong, ka dei ban khanglad ia katei ka jingthmu, ban pynkylla surok khlaw ia kane ka surok bah bad ka dei ruh ban sngewthuh, ba ka surok, ka lah ban iaid na kano kano ka jaka, hynrei ia ka tyllong um, ym lah satia, ban pynkynriah sha kawei ka jaka.