Shaei ki nong ialam ka Ribhoi?

Ha ka sobjek jong ka District bad ka Civil Sub Division, la iohi, ba ki nongialam ka Ribhoi, ki la sdang ialum lang bad ka long kaba i ai mynsiem, ba U bah DD Lapang, uba dei uwei na ki nongialam ba jrong tam jong katei ka thain, ula ia don ryngkat ban dawa ia ka Civil Sub Division ha Patharkhmah.

Hynrei ka jing kylli, kaba mih mynta, ka long “shaei sha kito ki nongialam ka Ribhoi?” bad ka dei ka jing kylli, ba kine ki nongialam, kiba don mynta, lem bad ki paidbah, kin hap ban kylli ialade hi.

Na baroh ki thain jong ka Ri Khasi Jaintia, ngi iohi, ba ka dei tang ka Ribhoi, kaba la pynmih shibun ia ki nongialam ba bit dor bad tang kiba ia kynmaw, ngi iohi ia U bah DD Lapang, na Nongpoh, kum u myntri rangbah, U bah EK Mawlong na Umroi, U Bah JD Rymbai na Jirang bad kitei ki la bat ia ki shuki nong ialam ha ka sorkar jylla; hadien kata u wan sa U Bah CB Syiem, Bah RR Makdoh, Bah Celestine Lyngdoh, kiba la khlieh kum ki Chief Executive Member jong ka Khasi District Council.

Hynrei mynta pat ka wan ka jingkylli, ia kaei kaba u paidlang jong katei ka thain, uba dei u trai jaka u trai muluk, uba lada shit ruh, un dei hi u Bhoi bad lada rang ryngkhiang ruh, un neh hi u Bhoi bad kitei kumno kin pyrkhat, ia la ka jong ka lashai?

Sngew tynnad ba ka mih ka jing dawa ban pynioh Civil Sub Division, ia ka Patharkhmah, kaba don sha khappud Assam bad ka jaka, kaba jngai, kumba 4 kynta iaid na Shillong; hynrei mynta, la iohi, kumba ha ka khlieh jong ka sorkar, Jylla, ki kham donkam District bad Civil Sub Division, da kito ki shnong, kiba jngai tang shi kynta iaid, na ka nongbah jong ka East Khasi Hills District.

Ngin dang ia peit bad kitbok, ba ka Ribhoi Durbar, kan nang iaid shakhmat, na ka bynta ban pyn urlong ia ka Patharkhmah, kum ka Civil Sub Division bad ka long ruh kaba itynnad, ba ka dei ha katei ka dorbar, ba ki nongialam ka Ribhoi, ki la lah ban weng noh sharud, ia la ki sopti ba ki phong, (na ka jinglong bad ka jingsngew parti) bad katei ka long kaba donkam shi katdei; namar ha kine ki sngi, ka la jyllei sat, ka jingieid parti bad na bynta ka parti, lada thok, lada shukor, ruh kam lei lei bad dei ban pynksan jubor, wat lada uto uba pyrshah, u kren ia ka mat kaba dei eh ruh.