Shaei ka New Shillong?

Ka New Shillong, ka la don ha ka plan, la kumba 35 snem antad bad katei ka long, lada ia khein ia ka rta jong ka jingtei ba nyngkong tam ha katei ka thain, ka hospital NEIGHRIMS.

Ka jingthmu ban tei ia ka new Shillong, ha katei ka por, ka long kumba kynriah ia ka nongbah na Sohra sha Shillong bad ha kitei ki por, ka jingthmu ka trei kam bad ka Shillong, ka dei ka nongbah bad ka Sohra, ka kylla ka nongbah rit.

Ka jingthmu ia ka New Shillong, ka dei halor kawei ka mat bad kata ka long ban pynduh jait ia ka dheng kali, ban kynriah ia ki ophis sorkar na ka Shillong rim, sha ka Shillong thymmai.

Hynrei, haba peit haduh mynta, ngi iohi, ba ka jingthmu jong ka New Shillong ka la pheil, namar ba ha ka kyrteng jong ka new Shillong, ki mih ki ing Nagaland House, ki mih ki ophis sorkar India, ki mih ki kam iadie khyndew ba shi tyngka sha ki ophisar bad ki ophis sorkar jylla, la iohi, ba ki skhem hi trait ha ka Shillong rim bad kam don satia kawei ruh, kaba la khreh iaid bad kumta ka Shillong thymmai, kam shym pyn duna briew eiei ruh em, na ka Shillong barim, hynrei, ka khring pynban ia ki spah ngut ki nongtrei jong ka sorkar India ba kin ia pyn khapngiah ia ka nongbah ba thymmai bad lah ruh ban ong, ba ym pat don, wat tang uwei (lehse) u nongsait painkhana, u ban leit poi sha ka Shillong thymmai.

Ka jingmut ka la kylla khongpong, bad ngim shym la iohi eiei ruh em, ba ka New Shillong, kan kylla long ka nongbah thymmai jong ka Meghalaya, hynrei haba shu peit, la iohi pynban, kumba kan long noh ka New Delhi ba thymmai, namar ba ki ophis ba heh jong ka sorkar India, ki la jan don lut ha katei ka nongbah.

La nang khmih lynti ba ki riew paidbah, kin poi sha ka New Shillong, ba kin leit shong leit sah, ba kin leit trei leit ktah, hynrei, la iohi pynban, kumba katei kam poi satia sha katei ka jingthmu bad kam dei tang katta, hynrei, la iohi, ba wat ki surok, ki jingkieng bad ki kali kiba iaid, kiba thmu ban pynsuk ia kiba leit na Old sha New Shillong, kim don satia bad kumta, ka jingthmu kam shym iaid kam satia haei haei ruh.

Ka la bha, namarkata, ba ngin ia klet ia katei ka Shillong ba thymmai, hynrei ka la donkam kyrkieh da ka Bye pass, na rud ka nongbah, ban nym ia kyrsum shuh hapdeng ki draibar trok bad ki draibar local taksi.