U Saleng Sangma, MP jong ka seng Congress, ula leh ia kaba bha tam, da kaba ula leit rah ha ka dorbar Lok Sabha ia ka mat ban iakren, halor ka jingshah leh niewbein jong ki nongshong khappud ha ka jylla, na ka daw jong ka jingker sainar shiah.
Ha ka jingkren jong utei u MP jong ka seng Congress ha Lok Sabha, ula pynsngew ba ki 82 tylli ki longiing, kiba shong ha khappud jong ka jylla, ki la hap mynta sha lyngba jong u sainar shiah bad kumta ka dei ka kamram jong ka sorkar India, ba kan ai ia ka jaka kaba biang, ba kin shong kin sah bad ba kin kynriah noh sha lyngba jong u sainar shiah, ha ki jaka kiba hap hapoh India, namar ba ki mad ia ki jingeh kiba har rukom, ha kaba kim lah shuh ban wad sha shiliang u sainar, hadien ka 5baje janmiet, na bynta ka dawai dashin, ka pang ka shitom bad ki jingdonkam ba har rukom.
Kaba lyngngoh, ka long ba haba kat katei ka lad, ka la plie, ban iakren ia ka jingeh jong ki para ri, kiba la shah pynhap sha shiliang jong u sainar shiah; hynrei U MP jong ka Shillong, um shym la ieng satia ban kyrshan ia ka jingkren jong U MP jong ka seng Congress bad katei ka lah ban long, ba um kwah ban shim bynta, namar ba ka dei ka mat kaba la leit rah da U MP jong kawei pat ka seng, lane ka lah ban long, ba um don ha katei ka dorbar, namar ba u bunkam ban leit kanbas ia ka elekshon MDC sha kylleng ka ri Khasi Jaintia bad lada ka long ha katei ka dur, ka pyni, ba u khaw khein kor, ia ka elekshon MDC, ban ia kaba leit ban shim bynta ha ka dorbar bah jong ka Lok Sabha.
Kane ka mat kaba la leit rah da U Saleng Sangma, ka long kaba donkam shibun eh, ban don ka jing iakren ha Parliament, ha kaba U MP ka seng NPP, uba don ha Rajya Sabha ruh, u dei ban ther tyngeh, ia ka jingleh niewbein jong ka sorkar India, ia ki nongshong khappud bad ka la donkam, da ka jingiatai kaba kham bniah, namar ba kane ka jingker sainar, ka la leh niewbein ia ki para ri kiba don ha khappud, ba kynthup ia ka jingbret noh ia ki shapoh Bangladesh bad kam dei tang kata, hynrei, la kurup ia ki jaka rep ba seisoh, haduh 150 yard bad nangta la pynthut ia ka leit ka wan, ka iaid ka ieng bad la khang sa ka iew ka hat, ha ka kyrteng jong ka jingker sainar shiah ban pynshngain ia u paidlang ka India, hynrei da katei kajuh ka buit, la sympat bad tynjuh ia ka hok longbriew jong ki para ri kiba don sha khappud.
Phi don ban ong eiei?