Kine ki parti prah, ki la sei lut ia la ki kam pohiing shabar bad kata kam dei ruh ia kaba bha, hynrei ha kaba ki ia thad iwei ia iwei pat bad kaba dang shu jia shen, ka dei halor ka jingthad jong uwei na ki synran jong u bah Adelbert Nongrum, MLA ka North Shillong, ia ki nongialam jong ka seng prah bad hadien kata, kaba la pynbud sa ka kyrwoh khubor, na utei hi U MLA, halor ka jinglong jingman jong katei ka seng.
Kine ki jait jingjia, ki long kiba ijli haduh katta katta, ha kaba ia ka jingiapher jingmut hapoh jong ka seng sain pyrthei, ki ia shim kabu ban thad pynban bad ha ka jaka ban wad ia ka lad ka lynti ban iakren iasuk ne poi sha ka jing iamap bad ia klet noh, hynrei ki nang pynheh bad ia thad la kumba thad jain jot bad kane ka nang ailad ia kiba nabar, ba kin tar lyngkhot lyngkhai ia katei ka seng thymmai.
Kane ka jing ia kawang ktieh, kaba jia ha kane ka seng sain pyrthei, ka pyni shai ba kane ka seng, kan nym lah shan slem satia, namar ba haba ka la sdang orpait, kumta kan nang iai twa shuh shuh, ha ki bnai ki ban sa wan, khamtam, ynda la kut ka elekshon MDC bad haba shu peit na sharud, la nang ithuh, ba ki bor kiba napoh jong katei ka seng (lehse kiba la shah thied ha ki seng heh jong ka jylla) ki la nang shim kabu ban pynmih ia ka jing iashut ban pynpait pynpra bad katei ka dei ka buit kaba satar bha, kaba la ju leh ha ki kynhun kiba khlain bor ha ka pyrthei, lada dei ha ki seng sain pyrthei, ki seng niam bad wat ha ki kam pynshit kiba long hapdeng kawei ka ri bad kawei pat.
Ngim tip, la ka VPP, ka sngewthuh ne em ia kane bad la ka iohi ne em ia ki mawjynthut kiba don ha ka lynti iaid jongka, hynrei lada ka lap dien trai noh, kumta ka dei, ban teh lakam noh ia kitei ki dak ki shin kiba pynmih ia ka jing orpait ha katei ka seng, hynrei lada jia ba kam lap daw, kumta ka lynti ka la plie ban kad arliang syndon ia katei ka seng bad kaba ha khmat duh, kan paw noh shen, hadien ka jingjied ia ki dkhot thymmai sha District Council.
Ka elekshon MLA kam slem shuh bad katei ka seng kam lah satia ban duh noh ia ka kabu ksiar, kaba ka la ioh ia ka jing ithuh bad ka jingshaniah jong u paidlang ka jylla, hynrei lada kane ka seng ka pheil, ha ka jingtreikam jongka, kumta kam lah satia ban tei pop ia ki nongjied kiba la kyrshan radbah ha ka elekshon MDC, hynrei ka jing kitkhlieh, ka leit sha ki nongialam jong kane ka seng thymmai.
Phi don ban ong eiei?