Sdang ka jingsam blanket, bai dawai

Namar ba ka elekshon, ka la nang hajan, la sdang mih ha ki kotkhubor, ia ka jingsam blanket, sam pisa bad kiwei ki jing iarap ia ki duk ki raitoi bad katei khlem pep, ha kito kiba im da ka mynsiem lalot, ki la sngew hun halade, ban ioh tare ia kitei ki tiar iohei.

Isynei sat ban peit, ba ha kum kine ki por, ba baroh ki briew, ki la sdang duk lut, da ka jinglalot bad rhah ia ka iohei suda bad kata ruh, ba ki kloi ban pdiang, lada ioh ia iwei i blanket, iba 200 tyngka, lada ioh ia ino ino i tiar iba shispah tyngka bad lada ioh pisa kaba sanspah, shi hajar, da kaba thap myntoi, na kiba ialeh elekshon.

Kane ka jingmut, ka la pohjait shi katdei ia ka jinglong jingim jong u briew, namar ba ha ki por, ba lajan ka elekshon, ngi iohi, ba u briew, u ia ap thap ia baroh jait ki jingdonkam, na ki kandidet lane na ki MLA bad katei ka kynthup, ba lada kwah sopti thymmai ruh, leit dawa na ki kandidet, lada kwah jain sop khun, lada pynlong jingiaseng ha iing bad ia baroh jait ki jingdonkam, ka bor jabieng kam trei kam shuh ban wad dalade, hynrei ban ap dngong da ka pisa iohei na ki kyrtong elekshon.

Kane ka jinglong, ka la ktah tylli tyllan ia ka rukom jied nong mihkhmat, ha kine ki sngi, namar ba, ha ka jaka ban wad ia u nongthaw ain lane u nong mihkhmat, ngi leit wad pynban, ia u nongsam pisa lane u nongai blanket bad kam dei tang katta, hynrei, ngi da shah pynbieit ruh, ba ia ka jing iohei, kaba mynta ka sngi, ngi kynmaw dngong ban siew kylliang da ka vote jongngi, ka ban long sa shisnem tam hadien.
Kaba kum kane ka jingrhah pisa bad kaba pyn iasoh bad ka vote jongngi, ka dei kaba dang shu jia ha kine ki phew snem ba ladep; katba ha kito ki nongialam kiba la rim, kiba dei ki soh ialeh hill state, kam shym la don satia, kaba kum kane ka jingthmu ha ki nong ialeh lane ha ki nongjied ruh kumjuh; hynrei, la ju kynmaw, ba ki dei ki nongjied kiba ia shim bynta ban ia synniang pisa malu mala, na bynta ka sha ka dud bad ka ja ka doh, ha ka sngi thep vote.
Ka mat kaba donkam eh hangne, ka dei namarkata, ba ngim dei ban kyntait, haba ki don kiba tyrwa sbun ia ka blanket, ka bai dawai bad kiwei; tangba ngi dei ban sngewthuh ba katei ka dei tang ka tamasa elekshon, tangba kam dei ka kam pynbieit thep vote.