Sdang ka iakren kam pud ki ar jylla

Lai sien, ki la ia kynduh, ki arngut ki myntri rangbah ka Assam bad ka Meghalaya bad ha ka sien kaba saw, kin ia kynduh ha ka 6tarik Nailar 2021, ban nang iakren shuh halor katei kajuh ka mat ha Guwahati.

Ha kine ki lai sien, ki jing ia kynduh, la iohi, ba ka la poi sha ka jing ia mynjur, ia ki 12 tylli ki jaka ba don jing ia kynad kam pud hapdeng ka Assam bad ka Meghalaya bad mynta ki ar ngut, ki myntri rangbah, la imat, kumba kin pynleit jingmut, ia kitei ki khadar tylli ki jaka ba ka don ka jing iakam na baroh arliang.

Wat la ka mat ia pynbeit pud, ka long kaba la khmih lynti la 50 snem duna, hynrei kaba shu pyn pyrkhat, ha kine ki sngi, ka long ba kumno kat ia ka mat ia pynbeit pud, kin ia shong jingialang hi tang arngut, ki myntri rangbah, khlem da don lang, ki myntri ba peit ia ka khyndew ka shyiap bad nangta ruh ki myntri ba peit ia ka tnat kam poh iing jong ki ar jylla.

Kumba la ju iakren man ka por, ngi hap ban shim nuksa, ia ka mukotduma, ki Kur Thangkhiew ha Marwet ban pyrshah ia ka jingtei ia ka ophis jong ka Assam, ha katei ka jaka, kaba dei ka hok nong kynti jongki bad katei ka la dei ban pynpei shkor ia ki arngut ki myntri rangbah, ba ki jaka ha Ri Khasi, Jaintia, ki hap ha ki trai bad kim hap satia ha ka sorkar bad kumta, lada jia ba u pud jong ka Assam, u lah ban poi sha Nongpoh ruh, hynrei ki trai jaka, ki lah ban don ia ka nong kynti sha Guwahati ruh, hynrei kin iai long hi ki trai, namar ba wat ka Bangladesh, ka ithuh haduh mynta, ia ki Khasi, ba kin long trai ha ki jaka, ba ki ju long trai, ha shwa ba katei ka Ri, kan ioh ia ka jinglaitluid.

Ka jing iakren jong ki arngut ki myntri rangbah, ka long ruh, ban nym ia kren shuh ia ka status quo, lane ia ka jing pynneh ia ka jaka, kumba ju long; hynrei ha katei ka mat, ka Meghalaya, ka hap husiar bha ialade, namar ba ioh ka nang ailad ia ka Assam, ba kan nang kyntur jaka, namar ba katei ka jylla, kam ju ithuh satia ia ka status quo bad ka dei na katei ka daw, ba ka tei surok sha Balakhwa, ba katei kut pulit sha Khadkhasla lane shajan Khanduli bad ka dang pynkhreh ban tei University bad nangta sa ka iing bah ha Khanapara, katba ka Meghalaya, ka nang ran dien ialade, ha ka nongrim jong katei ka kyntien status quo.