Satar shisha, ki seng na Garo hills

Lada ka long kumno kumno ruh, ka pyni ba ki sengbhalang na Garo hills, ki da satar shisha bad ki lah ban pynhap shuki jling ia U Chief Executive Member jong ka Garo hills District Council bad kata ruh, uba dang shu dep jied da ka iing dorbar jong katei ka Council bad uba la jop donburom, ha ka elekshon, kaba la pynlong dang shibnai ruh ym pat dap hok.

Ban ia kynthoh ruh, ka la eh than, namar ba kum kitei ki jing dawa, ki jubor bha ha Khasi, Jaintia hills ruh, hynrei, kim shym la iaid kam satia bad kawei na kitei, ka dei ka jingdawa ban weng kam mardor, ia ki nongsiat ia U Bah Cheristerfield Thangkhiew, ban pynhiar shuki ia U Ma Lahkmen Rymbui (uba la hiar shuki hi bad weng noh ia ka shithi weng kam hadien) bad kam dei tang katta, ki don ruh kiba dawa dangshen ban pynneh ia U DC ka East Jaintia bad nangta sa kiwei de, kiba shu kut tang ka jingbyr ngem kum u laren khlem hap slap.

Kitei ki jingjia, kumta ki pyn pyrkhat kein, ba kumno ia ki shakri sorkar ruh, ym don ba lah ban pynkhih ha Khasi, Jaintia hills; katba kat ia u kynrad, uba dei u nongthaw ain lane uba la jied don burom da ki 30ngut ki MDC ka Garo hills, hynrei ki seng bhalang, ki pynhap da kaba suk, kata ruh tang hapoh shibnai, ba u dang shu sdang trei kam.
Ha ki bym pyrkhat jylliew, ki lah ban khein sting, hynrei ha ki riew shemphang, ki la dei ban iohi dak lypa, namarkata, ba nangne shakhmat, ka jing ialeh elekshon ia ki khun dkhar ha Garo hills, ka la hap pyrda noh bad kata ka dei ka dak kaba shynna, namar ba lyngba kane ka jingjia, ki seng bhalang kin nang khlain bor bad ioh daw ban pyni sha u paidlang ka Garo hills, ba ka jingjied MLA/MDC ia ki khun dkhar, kam don jingmyntoi satia.

Niuma, kaei kaba ki pyrman sain pyrthei, ki shim halor kane ka jingjia ha Garo Hills, namar ba kan don kaba paw bad kaba rieh ruh, halor katei ka jingjia hi baroh kawei, namar ba bunsien ki riew sain pyrthei, ki leh ia kaba kim kren bad ki kren, ia kaba kim kwah ban leh.
Kam lei lei, hynrei, kan jin da la bha shibun eh, lada ki kynhun sengbhalang bad ki seng sain pyrthei, ki shim tution class halor kane ka mat, na ki sengbhalang na Garo hills.