Ym pat ju don kano kano ka sengbhalang, kaba nud ban saham ia ki Bank, khamtam ia ka State Bank of India, namar ba la shim, ba katei ka dei ka Bank kaba iajan bha bad u paidlang ha ka jylla bad ka dei ruh ka Bank, kaba bun tam ki nongbuh pisa, naduh ki duk haduh ki riewspah bad wat ka sorkar jylla ruh, ka buh bun bha ka pisa ha katei ka Bank bad katei ka Bank, ka la trei donbor bad leh mon shaba palat, khamtam sha ki nongkyndong, namar ba ki Bank ki duna bad kito kiba leit plie account bad kiba leit sei pisa, ki duh sngi duh ia, namar ba ki bun palat ki briew bad ki duna pat ki nongtrei.
Khyndiat sngi mynshwa, ka HYC, ka ujor tyngeh ia katei ka Bank, ba ka thung kam ha Ri Khasi, da kaba wan rah ia ki Scheduled Tribe/Scheduled Caste na kylleng ka India bad la iathuh ba ki don tang 3ngut ki trai shnong kiba ioh kam, na ka bhah kaba 33ngut.
Hangne ka wan shwa ka ktien bad kata ka long ba kumno ki bar jylla, kiba na kylleng ka India, kin leit sha ki nongkyndong jongngi, ban leit iakren bad ki paidbah, haba kim nang satia ia ka ktien Khasi bad kumta katei ka dei ka jingleh niew bein jong katei ka Bank, ia kito kiba la kyrshan ban pynkhlain bor ia ka.
Mynta haba ka HYC, ka la iaid ia katei ka kam, ka la dei ban iaid da kajuh ka lynti, kumba ka ioh kem ia ki nongdih droks, da kaba ai jingsumar ia ki bad hangne ruh, ka donkam ka jingiarap ia ki samla Khasi, da ki coaching centre, ba kin leh bha ia ki eksamin ba pynlong da kine ki bank bapher bad katei kan dei ka jingkyrkhu kaba khraw ia ki samla wad kam nangne shakhmat.
Ka jingkren jong ka HYC, ka dei ka jingshisha, namar ba ki Bank, ki la shlei mam da ki nongtrei kiba nabar suda bad khamtam ki khar Assam bad kane kam dei ba ki don tang ha State Bank of India, hynrei ha baroh ki Bank, wat ki bank shimet ruh, ki pyniaid da kine ki briew kiba nabar.
Shuh shuh, ka la dei ia ki seng bhalang, ba kin wad sa kawei ka jing shisha bad kata ka long, ba ka sorkar Meghalaya, ka buh pisa haei bad katno kine ki bank, ki ioh sut na ka pisa sorkar bad ba ngin wan rah ruh sa kawei pat ka mat bad kata ka long, ba katno ki la pynlut ha kane ka jylla, ha kaba ai ram, ai jing kyrshan ia kiba trei kam lajong, kiba leit pule, ki nongrep bad katei ka dei ban wan da ka jingkhein kaba shai, kaba ki ong credit and deposit ratio bad lada jia ba ki bun tang ka am, khlem kano kano ka jingai, kumta dei ban kynriah shisyndon ka jingbuh pisa bad ban leit wad sha kito ki Bank, kiba iarap ia ki trai shnong trai jaka.
Ka don sa kawei ka mat bad kata ka long ka Corporate Social respon sibility (csr) bad katei ka dei ka pisa kaba bun bah bad kaba ngi dei ban tip, ka long, la katei ka Bank, ka ju iarap ia kino kino ki riew kutlad, ki sengbhalang, ki khunswet khun rangli bad katei ka dei sa kawei ka bynta kaba dei ban sei shabar, ban iatip u paidlang babun.
Kat haduh mynta, kaba sngewsih, ka long ba ki MLA/MDC bad MP bad wat ki sengbhalang, haba don eiei ki shu tynruh beit ha Secreteriat, katba ki khmat jongki kim shai satia ia kino ki bar jylla, kiba la nang khapngiah ha ki tnat sorkar bapher. Kam dei tang katta, ngi dei ban sngewthuh, ba lada khot kam ka sorkar Jylla, na ka bynta shiphew ngut, kumta ka la dei ka kam kaba bun bah, hynrei lada khot kam ka North Eastern Council, ka tnat shipai, ka NEEPCO, ki Bank bapher, ka ICAR, ka power grid, ka NEIGHRIMS, ka IIM, post office bad sa shibun ki ophis sorkar India, kin khot da ki phew hajar ngut ki briew bad hangtei ka kham duna ruh, ka jing shah pynbor ha ka jing lushia ki MLA ne ki myntri sorkar.
Ka HYC, ka la nang iaid shakhmat, halor kane ka kam, ha kaba ka la tuklar ia ka jingthung kam ia ki nos ha NEIGHRIMS bad ka la tuklar halor ka jingthungkam ha ki Bank bad kaba donkam eh ia mynta, ka long ba kiba trei ha ki hospital, ki post office bad ki bank, ki dei ban nang ban kren Khasi, namar ba ki ia dei kam bad ki paidbah bad kaba khadduh, ka long ruh ba haba lait kam, dei ban pynbna iar ha ki kotkhubor Khasi, namar ba ki bun ki nongpule, kiba ha sor bad ha nongkyndong; hynrei haduh mynta, ym pat ju iohi, wat tang shisien ruh, ba ka SBI, kan pynbna ha ki kotkhubor Khasi, ba ka don ka jinglait kam ha katei ka Bank ba heh duh jong ka India.
Phi don ban ong eiei?