Sangah ki Bank, ia ki nongthep pisa

Kine ki sngi, ki dei kiba eh than, ha ka kamai kajih jong u paidlang, uba bun jong ka Ri, hynrei, ha kaba kum kane ka por, kaba sngew sangsot ban pyrkhat, ka long ba ka sorkar India, kam shym la phai khmat sha u luk u lak, hynrei, ka pyrkhat tang ialade bad ban nang pynat ia ki pla lajong bad katei ka dei ka jingmut, ka don bha, ha ka sorkar jylla bad khamtam ha ka sorkar India lei lei.

Ki nongtrei kam lajong, ha kine ki sngi, wat lada jia ba kim don bai khaw khun ha la iing, hynrei, kin hap ban siew ia ka khajna, kaba ki dei ban siew, lane kaba ki ong ka GST bad katei ka khajna, kam ap satia, wat shisngi ruh, hynrei, kan iai beh thong ia uno ne kano kano, ki bym lah siew ram dei por.

Kane ka sorkar BJP, ka la pynbor ia ki paidbah, ban thep pisa hapoh Bank bad ka la pynduh pisa ruh ha u snem 2016 bad katei ka la pyn kylla duk ksew ia kiba bun ki paidbah, namar la shu knieh jyndat ia ka pisa na ka kamai kajih jong u duk u rangli, uba kamai shitom, da la ka jong ka umsyep.

Mynta u paidbah ba bun, um don pisa shuh ha la kti bad kat ka pisa, kaba u don, um banse ban thep sha Bank; hynrei mynta ka mih ka jingeh bad kata ka long ba lada phi don bun ka pisa ruh, phim lah satia ban sei na Bank, katba phi sngew donkam, hynrei, ka Bank, kan buh kyndon, ba ba phin sei ia ka pisa la jong ruh.

Ym tang katta, lada phi don pat khyndiat ka pisa, hangta phin shah ot noh, sa ha ka Bank, lane kaba la ju tip paidbah, kum ka minimum balance bad kam kut tang katta, ka sorkar India, ka pynshlur, ba ngin ia sei pisa da ki ATM bad katei hi ka thew, ban sei pisa katba donkam, haba leit thied jingthied, haba leit donkam kyrkieh bad kumta ter ter; hynrei ha kine ki sngi, la pynmih sa ka kyndon, ba lada sei pisa palat ar sien (lane saw sien) katba kum ka jing pynbeit jong ki Bank, u nongsei pisa, un shah khate kumba T.15-20 shisien sei pisa.

Kitei ki jingleh namarkata, ki la shu pynlong ia ka Bank, ba kan kamai pisa, da kaba suk, na uwei pa uwei u briew, ha kaba ia ka pisa jong u shimet, kaba u leit bun shapoh Bank, u hap ban shah khate pynban, ha ka jaka, ba un nang ioh bai burom malu mala bad katei ka pyni shai, ba ka dei ka jingnion jubor ia u riew paidbah, lyngba kine ki ain.
Ka la dei ka por ia ka sorkar BJP, ba kan pdiang, ba kine ki ain, ki dei kiba leh niewbein ia u riew paidbah, da kaba phi knieh jubor ia ka umsyep jong uba bun, katba phi pynlut kai, ban tei ia ki maw mot, ia ki iing kiba itynnad na katei ka pisa; hynrei ngi hap ban kynmaw, ba ki ain, kiba phi thaw mynta, ki lah ban pynhun iaphi (ia mynta), hynrei, kin sa sympat kylla iaphi hadien, namar ba kajuh ka sorkar kam ju neh shirta ha ka bor.