Sangah ka KHADC,ia ki rangbah shnong, ba trei politics

Ka Khasi Hills Autonomous District Council (KHADC), ka la pynmih ia ka hukum jongka, ha ki khyndiat sngi ba ladep, kaba khang ia ki Rangbah Shnong, ki Sirdar, ki Matabor bad kiwei, ba kin shim bynta ha ki kam politiks bad katei ka dei ka kyndon, kaba donkam bha, namar ba ki Sirdar, ki Rangbah Shnong, ki la ia milai palat ha kine ki sngi, ha ka kam politiks bad ki dei kine kiba ieng rynsan ban kanbas ia u kyrtong, uba ki ia shah, ki dei kine kiba leit buh bynda ia ki nongshong shnong jongki, ha khmat ki MLA/MDC, da kaba ki leit pan skhim bad ki sa pyntrei hi dalade bad ki sa khung tyngka shibun shibun.

Kane kam dei ka dak kaba bha bad kito kiba kwah ban trei politiks, ki dei ban mih na ka kam Shnong bad rung sha kano kano ka seng sain pyrthei bad kito kiba kwah kit kam shnong, ki dei ban longpdeng ialade, ba kin nym thaw kulmar ha ki shnong ki thaw jongki, hapdeng ka parti kaba ki iashah bad kaba ki pyrshah.
Kumba ka long mynta, kine ki Rangbah Shnong, ki long pynban, ki nongbylla jong ki MLA/MDC, ha kaba ia ki kam surok, ki lynti iaid kjat, ki iing dorbar bad kiwei ki trei hi, ha ka kyrteng lajong bad ki sa kamai pisa shimet bad nangta ki jied ia ki skhim sha ki nongshong shnong, kiba kohnguh ia ki bad kiba kyrshan sha ka liang jongki, katba ki pynthut laiphew jait, ia kito kiba ialeh pyrshah.

Ka long kaba dei ba ngin kynmaw, ba ka dorbar U Khasi, ka dei borabor, kaba ia rai lang ia kawei ka jingmut bad kam dei satia, kum ha dorbar jylla lane ha District Council, ha kaba uba synshar u nion naphang ia ki khyndiat ngut kiba don sha ka liang pyrshah bad kumta ka jingleh ne ka jingsngew politiks, kam don satia ha ki dorbar shnong.
Ki jingjia, ha ka elekshon ba ladep, ki la dei hi ruh, ban pyn kyndit bynriew ia ki shnong bapher bapher jong ka Ri Khasi Jaintia, ba ka donkam ia ka bor shnong, kaba khlain ban lait na ki jingshim kabu jong ki shit khlieh politiks, da kaba ki leit shoh briew, ki leit thang iing thang sem, tang na ka daw ba ki rem elekshon bad kumta, ka donkam ia ka bor jong ki Waheh Shnong, lane ki Rangbah Shnong, ba kin dei ki bym shah liang bad ba kin teh lakam, ha kiba kum kitei ki jing iakynad ha shnong ha thaw.