Ka jingshemphang jong ki riew paidbah, la imat, kumba ka la nang hiar jur ha kine ki sngi bad katei ka paw shai ha kaba ki don bun kiba ia shongsngi bad kiba da pynlong ia ka khawai dawai, na bynta ban pdiang ia kitei ki skhim bad sa ka jing iathab kti kaba da sawa jam, haba dei ka jingot ribon lane pyllait paidbah ia kitei ki jait skhim sorkar.
Hynrei hangne, ka jingkylli, kaba ngi dei ban buh halade, ka long ba kato ka khajna, kaba ngi siew man la ka minit, haba ngi leit jingleit, ka poi sha ka pla jongno lane la pyndonkam sha kano ka bynta jong ka roi ka par jong ka sorkar?
Kat shaba ngi leit ha kine ki sngi, ngi hap ban siew khajna haba iaid ha surok, ki kali ki la dep siew khajna lypa lane kaba ki ong kum ka road tax, ka bai permit, ka insurance bad kiwei; hynrei ki ieng sa ki khyrdop kiba lum khajna na man kawei pa kawei ka kali bad nangta sa ka khajna na ka petrol kaba shi kit bad katei kam ktah ia u trai kali, hynrei ka ktah ia u nongleit nongwan.
Nangta haba dih sha ruh hap siew khajna, haba leit bam ha ki restaurant kiba heh ruh hap siew khajna, haba thied jingpruid, thied mluh, thied dai, thied mobile, thied kali bad baroh jait ki jingthied, ngi hap ban siew khajna bad katei ka khajna, lada ngi khein antad ha ka shisngi, ka lah ban poi da ki hajar ba ngi siew sha ka pla jong ka sorkar bad kumta ha ka shibnai ka khajna, kaba ngi siew ka poi da ki phew hajar sha ka pla jong ka sorkar bad ia katei ka khajna, la mang pat sha ki kam pynroi jong u paidbah, ha kaba sam tin, sam miej, sam shuki lyngba ki MLA skhim, shna surok, shna jingkieng bad sa kiwei kiwei; hynrei katei kam dei ka pisa jong ka sorkar ne jong uto uba sam bad katei ka dei ka bhah kaba ngi dei ban ioh bad kumta, haba ngi thab kti, ka pyni pynban, kumba ngi la klet noh ia la ka jong ka syep ka sar bad ka jingthiah ki shiah bad ki jingmong kiba tar ia ka met ka phad jongngi, ban tur ia ki raieh raidam, na ka bynta ban siew khajna bad ban pyndap ia la ka jong ka kpoh.
Ha kine ki sngi, haba ngi leit sharum shaneng, ngi iohsngew ia ka jingud jong uba bun balang, ia ka jingkiewdor jong ki mar ba kongsan bad kumjuh sa ka jingtad jong ki mar rep mar riang, hynrei ia kane ngi dei ban sngewthuh shai, ba ka don jing iasnoh ia kajuh ka mat bad kata ka long, ba ki khajna kiba har rukom, ki la tied ha ban da biang ia u paidlang ka Ri.
Phi don ban ong eiei?