Sam jaka iing U MR sha ki spah ki longiing, sha Garo hills

Ki 442 tylli ki longiing, kin long kiba donbok tam, ha shwa ka elekshon MLA 2023 bad ka daw, ka long ba kin ioh ia ka jaka bad kin ioh ia ka iing bad kitei ki kynthup ia 100 tylli ki longiing ha ka khlaw sorkar lane ka Reserve Gittim bad sa 342 ki longiing ha Them Metor, ha kaba yn kynriah noh ia ki sha ka jaka ba ki shong ki heh ki hain lane sha European Ward bad kitei ki dei ban ainguh let ia U Conrad Sangma, myntri rangbah, namar ba u leh ia kaba bha tam, na bynta jongki bad ka bym shym la leh satia ia ki 30lak ngut ki nongshong shnong.

Katba kynmaw, ka don tang shisien ka jingai jaka iing ia ki para Khasi, ha ki snem 80 ha kaba ka sorkar India, ka la shna ia ki iing jong ki duk ki rangli ha Nongmynsong bad ha shwa kata, sa ka jingai jaka ia ki poiwir Bangladesh ha Umpling bad lait na kita, kam don shuh haei haei ruh.

U dak jingkylli, uba heh bha, hangne u long, ba ia ki jaka puta ha New Shillong lane ha Mawdiangdiang, la shu ai ei ia ki poiwir poihap, katba ki trai shnong, ki shah beh, shah jynrat naphang ha ki bor jong ka tnat pynroi sor bad kat ha kine ki sngi, la iohi, ba katei ka sor thymmai, ka thew pynban, tang ia ki ophis sorkar jylla, ki ophis sorkar India bad ia ki briew kiba nabar, ba kin ioh jaka puta bad ioh iing ioh sem, katba ki trai shnong, ki hap ban shu peit jawdud ialade, namar ba kam don kano kano ka jingplie lad, ba kin ioh shong iing hangtei.

Wei haba U Conrad Sangma bad U bah Prestone Tynsong, ki la ai ksai, kumta ka dei ia kiwei pat ki nongshong shnong jong ka Ri Khasi Jaintia, ba kin wad lad wad lynti, wad jaka puta bad ai jingmut ia ka sorkar jylla, ba kan plie lad lem, sa ia kiwei ki phew lak ngut, ba kin ioh ban rieh ia la ka khlieh, da kaba ki don ia la ka jaka iing bad ba kin ioh ban shna ia la ka ka iing ba sop da u phlang (wat lada kin nym ioh ia ka iing 7 mala) bad ia kata, yn jin da la lah ban leh, lada ka sorkar jylla, kan kurup jaka iing, kumba kurup ia ki jaka shna surok bad ban sa sam ia ki duk ki raitoi.
Kane ka dei ka mat kaba kongsan bha, ha shwa kane ka elekshon, namar ba u paidlang ka jylla, ula bun uba shong iing wai bad ha kane ka rukom, kin sa poi kiba shong iing ha ki rud surok.