Sa ka por iaroh ia ki MLA

Ha kat kane ka khlam, kaba la shyrkhei sat, ha kaba kawei pa kawei ka long iing, ka iam ka ud, na ki jingeh ba bun, kum ka pang ka shitom, ka thngan, ka khlem kam, khlem pisa bad kumta ter ter, hynrei, la iohi, ba ki don ki riew paidbah, lane ki nongialam shnong bad kiwei, kiba ia risa bad ai jing iaroh ia ki MLA, haba ki ai khaw, ki ai mask, ki ai kali bad sa kiwei ki jing iarap bapher.

Ka jing kylli, hangne, ka long, la ngi jied MLA, ban leh aiu? Lada ngi jied MLA, tang ba un shu long u nong mihkhmat, kata, ngi dei ban da pyrta jam, haba u ai jingiarap, hynrei lada ngi jied, ba un pynioh ia ki jing iarap bapher, kumta, ka la dei ba ngin pynduh noh ia kine ki jait jing pyrta kiba sngew jlep sat.
Bun kiba sngewthuh bakla, ba haba ioh khaw 5 kilo, ki shim, ba ka dei ka jingai U MLA, hynrei, katei ka dei ka skhim jong ka sorkar India bad lada ai khublei ia U MLA, hap ai kham bun ia U Modi ruh.

Ka kamram jong U MLA, ka dei, kaba ngin sngap bha, ha ka por, ba u iaid kanbas bad hada ngi iohsngew, kumta ngi dei ban khmih lynti ba kitei ki kam kin urlong.
Kam kut tang katta, ki jing ai jingiarap, kiba la ai da ki seng bhalang (lehse), ki lah ban wan na ka pisa jongki, ki jingiarap ba ai ki mishon, ka lah ban wan na ka pisa jongki hi, hynrei haba sam khaw U MLA, hap kynmaw ia ka T.25lak, kaba la dep ai sbun mynsiem, ka sorkar Jylla myn shem snem, nangta haba u sam jing iarap mynta, u snem, hap kynmaw, ba u myntri rangbah, ula dep ai bor lypa, ba ki MLA kin pyndonkam ia ka skhim jongki, katba kum ka jing ibit jongki, ha kane ka khlam covid.

Ym dei ban klet, ba haba ki sam khaw, sam shini ki MDC, ba ka KHADC, ka la dep mang pisa, myn shem snem mar T.10lak bad hap ruh ban kynmaw, ba kitei ki pisa, kiba mih kattei, kim dei ki pisa jong U MLA, ne ka sorkar India, ne ka sorkar jylla, hynrei ki dei ki pisa jongngi hi, kiba la shah ot man ka sngi, ha ki khajna bapher.
Ngi ki khasi, ba ngim ju siew tax, imat, ngi shu shim beit, ba ki jing iarap jong ka sorkar, ki dei kiba shu hap kum ka mana na bneng, hynrei kam dei satia kumta.

To kam pher, lada ngi kwah eh ban iaroh MLA, MDC, MP, da ka jing sngew ieid, hynrei, ngi la dei ban jied ia ki rukom ai, namar lada ngi ioh khaw 5 kilo, ngi iaroh sorkar, ngi hap kynmaw, ba ka dor u khaw reshon ka long 3tyngka shi kilo, lane 15 tyngka san kilo bad kata ka pyni, ba ngi niew kor shi katdei ia 3 tylli ki kot san tyngka.
Ha ka juk ka khlam, ka la dei namarkata, ba haba ngi iarap briew, ba ngin buh noh ia ki camera ha iing bad ban nym ai kotkhubor ruh.