Ha ki khyndiat sngi ba ladep, ka la mih ka jing ia kawang ktien hapdeng ka seng sain pyrthei VPP bad ki bor pyniaid shnong ka Mawlai lane ka Mawlai Town Durbar (MTD) bad ka daw ka long, ba ki dorbar shnong ki kwah ban pynlong, da ka jingialum lang ia baroh ki kyrtong MDC, ha kajuh ka rynsan.
Ngim tip na kano ka daw, ba katei ka seng sain pyrthei ka kwah wad daw marwei marwei, haba kiwei pat ki kyrtong bad ki seng kiba iakhun ia katei ka elekshon, kim shym la wad daw satia ia ki bor pyniaid shnong ha Mawlai.
Ka kam elekshon, ka shong ha ka rai jong u paidlang jong ka Constituency ba un jied ia kano kano ka seng, kaba u sngewbit bad sngewmon ialade; hynrei ia ki kyndon ban pyniaid beit na ka kam ia buaid elekshon pat, ka dei ka kamram jong ka sorkar jylla lane ka tnat pyniaid elekshon bad nangta sa ki bor pyniaid shnong, khnang ba ka jingjied nong mihkhmat kan long kaba iaid beit iaid ryntih.
Ngi ju iohi, ba ha ki por elekshon, ki don kiba ia dih buaid, kiba ia shad ia kyrdem, kiba ia hylla ia kyrkait, kiba leit tied iing ha ka por shiteng miet bad kiba byrngem byrsit ia kiwei, nangta kiba leit pynkulmar ha ki shnong ki thaw bad na bynta ban teh lakam ia kitei kam dei satia ka kamram jong kano kano ka seng sain pyrthei, hynrei ka dei ka bynta jong ki bor shnong bad nangta sa ki bor pulit ruh.
Ha kane ka juk social media, la iohi, kumba ki jingleit jingialang sha ki shnong, kim don jingmut eiei shuh satia, hynrei kan jin da la bha, lada kiwei ki bor shnong, kin bud ia ki kyndon jong ka shnong Mawlai bad kata ka long, ban pynlong noh da ka rynsan paidbah lane ka common platform, ha kaba baroh ki kyrtong kin sei ia la ki nia ki jutang jongki, ba ki don na ka bynta jong u paidlang ka jylla bad ia kitei ki jingiasei juban jongki, dei ban pyni paidbah, lada ka dei da ka live telecast ne da kaba pynmih ha ki youtube channel.
Ha ki ri kiba la kiew shaphrang, ka ju don ka jing iatainia, da ki kyrtong ha shwa ka elekshon bad kat uno uno uba ki paidbah, ki sngew iahap jingmut, kumta u ju ioh, ia ka jingkyrshan jong kiba bun bad ha India ruh, ka la dei ka por ban sei ia ki khraw jutang, kum ki nongmih khmat, ym ban shu sei da ki riew madan, namar ba katei kan ktah jur ia ka burom ka ijot jong kata ka Constituency kaba jied ia ki bad ia ka jingtbit jong un uno u kyrtong, lah ban iohi shai, lyngba kitei ki jing iatainia ha ki rynsan paidbah.
Phi don ban ong eiei?