Sa 3 snem, kan shimpor, ban trei dep, ia ka surok Shillong Dawki

Ka don ka jingrwai, kaba ong “Ban pynjot te ka kloi, ban tei pat kaba eh” bad ka dei hangne, ba ka leit iahap hi sbiak, ha kaba iadei bad ka jingtrei ia ka surok Shillong Dawki bad nangta, ka don shuh ka kyntien “U trai u lah ban leh katba u mon, ia la ka jong” bad kitei ki kyntien, ki biang palat, ban pyndonkam ia ka jingkhongreng jong katei ka surok, kaba la dei ka jingtrei kaba sniew tam jong kane ka phew snem kaba mynta.

Ki don shibun ki surok, kiba la pyntrei ha kylleng ka Ri Khasi Jaintia (khlem iakren ia ka Garo hills), hynrei, ba kin kylla pyut, kumba long ka surok Shillong Dawki, te kam pat ju jia satia.

Ka jingsniew tasam, katei ka surok, ka dei, naduh ba dang sdang ban ruid lain lynter bad la iohi, ba ki la mih shibun ki jingwohnia bad ki jingpyrshah da ki trai jaka, da ka jingleh thombor jong ka kompeni bad haduh mynta, ki don bun bah ki trai jaka, ki bym shym la mynjur ban tei ia katei ka surok bad nangta, ki don sa ki bynta, kiba hap ban kynriah noh, kumba ka paw, ia ka shnong Pynursla, Mawshun bad ka thain Wahkdait hi terlyter shaduh Tamabil.

Kaba paw shai mynta, ka long ba ka NHIDCL, ka la pheil, ia la ka jong ka kam bad mynta, ka pan por sa 3 snem kynthih bad lada ka long kumta, katei ka kompeni, ka dei ban sangeh noh shwa ia ka jingkhynra ia ki lum ki wah, ban pynpra ia ki maw ki dieng; hynrei, ka dei ban ruid shwa ia u lain, uba beit, da kaba iakren pynbeit bad ki trai jaka ha shilynter ka surok, ha shwa ban sdang ia ka kam.

Kam dei tang kata, ka dei ka kam jong katei ka kompeni, ba kan maramot ia ki surok kiba rim, kiba ka la pynjot bad ba ki kali, kin iaid na kito ki surok, kiba kynsai, kiba la shna da ka sorkar phareng.
Ka tnat PWD, ka dei ruh ban pyni teng noh, ia la ka bor, ha kaba kan tuklar dalade hi bad kam dei shuh ban shu peit kai narud, namar ba ia mynta hi, kitei ki kompeni bar jylla, ki wad hi, ia ki kontraktor, ki wad ki wad hi, ia ki nongbylla bad kumta, ki la shu ialeh kput ha ban da biang, namar ba ka dei ka surok, ka bym don trai.

Ka dei ruh ka kamram jong ka sorkar jylla, ba kan hukum ia katei ka kompeni, ba ia ki rukom trei bapher jongka, ba kan da pyntip sani sha ki kotkhubor, ba ki paidbah kin sngewthuh, hynrei kumba ka paw mynta, ka shu khang kali ruh, katba ka sngewmon bad katei ka jingleh, ka pynthut ia ka ding ilektrik bad ki mobile phone, ha ka thain baroh kawei.