Pyrshah CEM, ki seng bapher ka Garo hills

Ki sengbhalang bapher ka Garo hills, ki don ha ka jing iakhih ha kine ki sngi bad ka daw, ka long ban pyrshah ia U Chief Executive Member (CEM) ka Garo District Council, uba dang shu jop shen, U Rakesh A Sangma bad ka daw, ka long ba U Rakesh, u dei u khun shipiah lane u khun shiteng bad la ong ruh, ba u ju bud ia ki dustur jong u kpa jongu, uba dei na ka jaitbynriew Nepali.

Halor katei ka mat, la iohi, ba ki sengbhalang na Garo hills, ki da satar tyngeh, ba kat ia U CEM, uba la jied da ka iing dorbar GHADC, ki dang ia pyni bor ban pyn khyllem syndon bad katei kein ka dei ka dak, kaba satar jong ki kynhun sengbhalang jong ka thain.

Halor katei ka jing dawa jong ki sengbhalang, ki kren shai, ba ki sngew tieng her, ba ia ka dustur ka riti jong U Garo, yn aiti ba un tuklar, da utei u bym dei U Garo nylla bad katei ka dei ka mat, kaba kongsan, ba ki riew shemphang ha ka ain ka kanun, kin shut jabieng bha ialade.
Khlem da iakren jrong ia ka Garo hills; hangne, ka wan ka mat kaba kongsan, ba lada u khun shiteng ha Garo hills, um long uba bit ban long CEM, kumta hi ruh, um dei ban long uba bit ban long MDC bad kumta, lada um bit ban long MDC, kumno pat, un long uba bit ban long MLA, lano kumno pat un bit ban long ophisar ha ki ophis sorkar jylla?

Ka la ju don ka jing iakren halor kane ka mat bad ka Khasi Hills District Council ruh, ka la dep shim teng ia kane ka rai, kaba pyni, ba ki khun dkhar, lane ki khun shipiah, ha kaba ka kmie, ka dei ka Khasi, katba u kpa, u dei u dkhar, kim bit ban shim ia ka jait jong ka kmie lane ha kawei pat ka kyntien, ka pyni, ba kim dei ki Khasi bad haba kumta, ki duh noh, ia ka dustur riti, ka jinglong jingim bad ka bhah kyrpang, kaba dei ia ki khasi nylla.

Ha Khasi, Jaintia District Council ngim pat ia tyngkhuh, ia kiba kum kine ki jingjia, haduh ha kine ki sngi, hynrei, lyngba ka jing ia khih ki sengbhalang ha Garo hills, ka la dei namarkata ia ki heh khlieh jong ka Executive committee ha Khasi bad Jaintia hills, ba kin pyrkhat lypa ia kane ka mat bad kam dei hi tang kumta, hynrei wat u paidlang uba jied ia ki MDC sha ki ar tylli ki District Council, ba un kyndit bynriew noh, ioh u shu ia tyngkhuh kai, ia kum kine ki jingjia kiba pynbudnam.