Pynrem u nongbishar, halor ka jing siat kput, ia U bah Cherish

Ka kaiphod halor ka jing shah siat iap U Bah Cherishterfield Thangkhiew, ka la mih pyrthei ha ki khyndiat sngi ba ladep bad katei ka dei hadien shisnem tam, ba utei u dkhot ka jaitbynriew, ula shu duh ei ia ka jingim jongu, ha ka jingshah siat iap ha ki pulit thrang snam, ha ka iing sah jongu, ha Mawlai Kynton Massar.

Kin don ki ban kren pynrem ne pynksan ia ka jingleh jong ki pulit, hynrei ka kaiphod na u nong bishar ba rangbah, U Justice T Vaiphei, ka la nion tyngeh, ia ka jingleh kput jong ki pulit halor ka jingiap jong U bah Thangkhiew, namar ba ki pulit kim shym la plan bha ia ka jingleit ban kem, ia utei u rangbah, ha kaba ki la leit ha ka por shiteng synnia, hynrei kaba sngew sammut, ba tang ka torchlight ruh kim ia don.

Ka kaiphod, ka dei kaba la pynlehrain jur ia ka tnat kam poh iing jong ka sorkar jylla bad ngim tip, la u myntri jong katei ka tnat, lane ki MLA jong ka iing dorbar, ki iahap ne em ia katei ka kaiphod jah dak, ha kaba ki la bun ki jaka, kiba shah tah sia lieh lane pynjah dak bad namarkata, katei kam dei satia ka kaiphod, kaba ngin ong “original” report, hynrei, katei ka dei ka duplicate copy jong ka kaiphod, kaba la leit buh ha miej jong ka iing dorbar.

Haba ngi kren ia ka kaiphod, ka mut ba ka dei ban long kaba pura; hynrei, kaba pynsngewkhia, ka long ba nalor ba ka dei ka kaiphod, ka bym biang eiei ruh em, hynrei ka mih, sa kawei ka mat bad kata ka long, ba u myntri rangbah, u ong, ba un khot bad iakren, ia kito ki pulit, kiba donkti ha katei ka kam bad lada ka long kumta, ka pyni, ba kam don jingmut ban pynlut kai, da ki phew lak ban thaw ia katei ka komishon, namar ba ia ka rai ban pynshitom ne ban map ia ki, ka dei pleng ha ka bor jong ka sorkar jylla.

Ka kaiphod, ka la slem palat bad ka la dei ia ka sorkar jylla, ban nym leh counselling shuh ia kitei ki riew thrang snam, hynrei, ka la dei ban pyni da ki kam bad lada jia ba kam nud ban leh kumta, ka pyni, ba ka jingthaw ia ki komishon, ka shu kut tang ka kam pynbieit briew suda bad kam dei tang katta, hynrei, ka dei ka jingleh niewbein, kaba palat liam, ia ka iing jong utei uba shah pyniap bad ka jingkhein pohjait ia ka burom ka ijot jong utei u rangbah, uba dei u dkhot, uba ka iing ka sem jongu, ka niewkor haduh katta katta.
Ngin dang ia peit shakhmat, hynrei lada ka jingbishar hok kam don, kumta ka pyni, ba ka hok ka sot, kam ieng shuh, ia u paidlang paidkar ha kine ki sngi.