Hadien ka elekshon MDC, la ioh sngew na ki hamsaia ba ki don ki kyrtong kiba pynlut ia kane ka elekshon haduh T.5klur bad kitei ki kynthup ia ki kyrtong jong ki seng heh kiba synshar ha ka jylla.
Katei ka jingpynlut pisa, ka la pynkhein ia ki kyndon jong ka tnat elekshon jong ka sorkar jylla, kaba la mang tang T.5lak, na bynta uwei u kyrtong bad ha kawei ka Constituency, hynrei ka long kaba lyngngoh ba ka tnat District Council Affairs (DCA) jong ka sorkar jylla, ba kam shym la teh kyndon satia ia ki kyrtong elekshon, ba kim dei ban pynlut tam ia katei ka bhah, kaba la buh ryngkat ia baroh.
Ka jingkylli kaba shai, ka wan namarkata, ba lada hap ban pynlut haduh T.5klur, na bynta kawei ka elekshon MDC bad ka tulop, ka ban ioh ka long T.1lak shibnai, kumta, ynda la kut ka 5 snem ruh, kan long tang T.60 lak bad kumta ka pyni shai, ba ka jingjop MDC, kam dei shuh ban trei ia ki kam pynroi jong u paidbah, hynrei ka dei tang ban ioh tuh bad ka jingtuh ruh ka dei kaba jubor haduh katta katta, na ka bynta ban pynmih ia ka T.5klur lane ban ioh tam sa T.5klur, na kaba la pynlut na la pla.
Kane ka jingsei pisa maphot jong ki kyrtong, ka jia bha ha ki nongkyndong bad kumta kane ka jinglalot tasam jong ki paidbah, ha kaba ki dawa ia ka T.2 hajar haduh T.5 hajar na ka bynta shi vote bad kumta, ha kaba kum kane ka elekshon, ki kandidet kim dei shuh ki heh jabieng, hynrei ki dei pynban, ki heh pla suda bad katei kan wan rah ia ka jingduhnong ia ka thain ba ki mihkhmat, hynrei kan shu pynmyntoi tang ia kito kiba jop lem bad ki briew jongki hi.
Ka Ri Khasi, ka la jot bad ka la ngop ha kane ka bih kynsha kaba shyrkhei haduh katta katta bad ka jingduk jong ki briew sha ki nong kyndong, ka pynlong ba kim salia ban tare ia ka T.500 ne ka T.1000 ban die noh ia la ka jong ka hok ban thep vote bad ka hok jong ka synshar paidbah bad kane ka dei ka jingjia kaba sngewsih sat haduh katta katta, ha kaba ka jingshisha kam don shuh, hynrei, ka don tang ka kam thombor bad ka jingleh trai khlieh jong ki kyrtong elekshon bad kine kein ki dei ki kam, kiba pynjot thiaw ia ka jinglong kyrpang jong ka jaitbynriew bad ki jingshah thombor ha ki kam pynjot ba har rukom.
Phi don ban ong eiei?