Pynkhyllew u myntri ia ki District Council

Ha ka jingwan jong u myntri ka sorkar India, U Kapil Moreshwar Patil, ha ki khyndiat sngi ba ladep, sha ka jylla, ula iaroh jur ia ki District Council, hynrei ngim tip, la katei ka dei ka jing iaroh ne ka dei tang ka jing pynkhyllew pynban!

Ha ka por jong kane ka sorkar India, kaba mynta, ngi iohi, ba ki District Council, kim don bynta eiei ruh em, ha kaba iadei bad ka jingthmu jongki, ban nang pynkhlain ia ka iktiar, kaba ki la don lypa bad ka ain ban nang pynbha ia ka Sixth Schedule, ka shu sahteng haduh ha kine ki sngi, hynrei ki mih pynban, tang ki jing iakren ia ka Panchayati Raj lane ka jingjied ia ki bym dei Khasi, kum ki dkhot shu sieh sha ki dorbar District Council bad sa kiwei pat ki mat, ki bym iahap, na bynta ki trai jylla.

Na ka jingkren jong u myntri, u pyni, ba ki skhim jong ka sorkar India, ba kynthup ia ka NREGA lane ka skhim 100sngi, ka trei kam bha ha ka jylla bad u ai burom ia ka bynta jong ki dorbar shnong, lane ki District Council, halor katei ka bynta; hynrei katei ka jingkren ruh, kam don jing iashoh satia, namar ba ka jingtrei ia ki skhim shispah sngi, kam don bynta eiei ruh em bad ki District Council, hynrei ka dei ka jing kitkhlieh jong ki shnong bad ka sorkar Jylla.

Kumba ka long hi mynta, ki District Council, ki shu sah mynsiem malu mala bad kata ruh, ka dei tang ka kam bei pisa ia ki MDC, ba kin ialeh MLA bad ba kin sam ia ki MDC skhim sha ki nong tep vote jongki; hynrei lait nangta, la iohi, ba ki kam jong ka Council, ki dei tang ki kam shu thoh bad shu kren, hynrei, kim lah satia ban pynurlong ia kiba bun ki jingthmu jongki, ba ki shah tan tdong ha ka sorkar jylla bad nangta, ba kiba bun hi ruh ki dkhot, kim ju duriap ialade, halor ka lyngkor ba ki don, hynrei ki shu iai thap ia ka aiom elekshon.

Ngin dang ia peit, na katei ka jing iaroh jong utei u myntri, la kan don khyndiat ka jingbha ne ioh lehse, kan nang wan rah pynban, ia ka jingsniew ia ki District Council, ha ka jylla, kiba la don lypa mynta, ha ka jingdkoh ha bun ki liang; hynrei khlem pep, lada ka sorkar India, ka pyn jynsur ia ki kyndon ba ki bor shnong, kin nang trei kam bha, kumta ki dorbar shnong, kin pyni ia shibun ki kam radbah, kumba ki long hi ki Panchayati raj sha Rithor.