Ha ki khyndiat bnai ba ladep, ka Meghalaya High Court, ka la pynmih ia ki katto katne ki rai, kiba u paidlang ka jylla, u donkam bha ban ia shai bad kitei ki kynthup ia ka ain thungkam ha ki ophis sorkar lane ka reservation policy lane kaba ngi ia tip bha mynta ka roster system bad nangta, ka la don ka rai halor ka jingkhang ia u mawshun, ban shalan shabar ri, lane ba kiba don ia ki par maw, kiba rit, kim lah ban shalan bad kiba don ia ki par kiba heh ki lah ban shalan bad nangta, ba la buh kyrdan ruh ia u maw, uba bha bad uba sniew bad nangta, ha kajuh ka por, ka mih ka rai jong ka kashari, halor ka jingshalan tuh ia u dewiong, ha kaba katei lei ka la pynkhie bitar jur ia kashari, namar ba katba nang bishar, nang jyllei ka jingdie tuh dewiong, kat haduh ba ka kashari, kan khot tian bishar lane contempt of court ia ka Chief Secre tary barim bad kumjuh ia U Chief Secretary ba mynta ruh.
Ka jingkylli, hangne ka long, ba balei pat, ba ka sorkar jylla, ka iai ialeh pyrshah ia ka jingkhaii dewiong bad ka nud ban thok pyllein pyllein, kat ia ka kashari, katba ia ka ain roster pat, tang shu pynmih hukum ka kashari, ki la pynstet ban pyntreikam bad kumjuh wat ia u mawshun ruh, haba ka jing bishar, ka dang iai bteng, hynrei ka sorkar, ka la khang shalan bad khang mawshun, la bun bun bnai mynta.
Ka sorkar, ka la dei ban iaid da u juh u diengkot ia kitei ki lai tylli ki mat bad ia ka roster lei, ka la dei ban pynduh noh, namar ba katei kam dei satia ka ain, hynrei ka dei tang ka notification jong ka sorkar jylla bad kaba la mang ruh, tang 10 snem (naduh u snem 1972) bad halor ka jingkhaii mawshun, khaii maw bad kiwei ki mar, lada ka sorkar, ka la pynhap ha ka kyrdan major mineral, kumta ka bor jong ka sorkar jylla, kan sa kut noh bad kan sa shimti hi, ka sorkar India bad kan pyntrei ia baroh, da ki kyndon jong ka Mines & Mineral (Regulation Development) Act, 1957 bad katei kan dei ka ain, tang ia ki heh bor bad ki heh jabieng.
Ka jingshisha, halor kitei ki mat, ka long kaba shai bad kaba suk bha ban thew tarajur bad katei ka long ba kitei ki ain, ki thew beit ban pynkdang ia ki heh bor heh sor bad nangta, ban pynbiang ia kawei ka kynhun; ym ia u paid salonsar jong ka jylla.
100 % ✓