Pynibor ki DistrictCouncil, ia ka Sorkar India, halor ka UCC

Haba peit ha kine ki sngi, la iohi, kumba ka bor jong ki District Council, ka khlain pynban shibun shah, ban ia ka sorkar Jylla bad kata ka long, ba ki District Council, ki nud ban ieng pyrshah ia ka sorkar India ruh, halor ka ain, kaba kim sngew iahap satia; tangba hangtei ruh, ka don ka jingshisha, namar ba ki treikam katkum ki kyndon jong ka Sixth Schedule jong ka riti synshar Ri bad halor kane ka mat, la dei ban ai burom ia ki Chief Executive Member jong ka Khasi, Jaintia bad Garo District Council, ba ki la nud ban ieng pyrshah, halor ka jingthmu ban pyntreikam ia ka Uniform Civil Code (UCC) ha u pud u sam jong ka Sixth Schedule.

Tangba ka dei ruh ka jing shisha, ba ka kamram jong ka sorkar jylla, ka dei ban pyntreikam hok ia ki skhim jong ka sorkar India, katba ka kamram jong ki District Council, ka dei ban iada ia ki riti dustur jong ki rit paid Khasi, Pnar bad Garo.

Kam dei tang kata, ngi iohi ruh, ba wat ka sorkar India, ka shynrain ia ka 6th Schedule bad dei na kata ka daw, ba wat ia ka ain buhai shnong ki briew kiba na ki Ri ba marjan lane ka CAA, ba kam nud satia ban thombor ha ki jaka shong jong ki Khasi, Pnar bad Garo bad katei ka dei ka jingshem phang jong ka sorkar India, ha ka por, ba ka shim ia ka jingmynjur ia katei ka ain ha Parliament.

Hynrei, haba peit pat ia ka jingtreikam ka sorkar jylla, ngi iohi, ba ka shu long niang kohnguh nadong shadong ha ka sorkar India, ha kaba ia ka ain jong ki Rangbah Shnong (VAB) ruh ka shu shah jem ha ka sorkar India, ka MRSSA ruh kam iaid kam, ka ktien Khasi ruh, kam iaid kam, u dewiong ruh, um long kam bad u pud u sam ruh, ym iaid kam, ia ka CAA ruh leit ia mynjur lang ha Parliament, ia ka lynti rel shu pyndem niuhmat ialade, nangta sa bun bah ki ishu, kiba ym lah niewtang shuh, halor ka jingtlot trei kam jong ka sorkar jylla.

Lada ka long kumne, ka por, ka la dei ia ki District Council, ba kin shimti hi noh, ia ki ishu kiba kham eh bad kiba kham heh bad iakren beit beit bad ka sorkar India bad kiba ha khmat eh, ki long ia u pud u sam, ia ka khyndew ka shyiap, ia ka ktien ka thylliej bad kiba bun ki mat, ba la pdiang da ka sorkar India, naduh u snem 1951.