Pynduh ka RBI, ia ki kot 2000, ba rong saw bthuh

Ka Reserve Bank of India (RBI), ka sei ia ka jing shisha, ha ki khyndiat sngi ba ladep, ha kaba ka pyni, ba ka jing pyntrei kam ia ki kot 2,000, ka la hiar shi katdei bad la pyni, ba kitei ki pisa, ki la jah haduh T.57 hajar klur na iew, kaba sdang naduh u snem 2019 ter ter.

Ha ka jinglap jong ka RBI, la pyni, ba kitei ki pisa, ki long kiba suk bha ban buhrieh bad katei ka dei hi ka jing shisha, namar ba ha ki por elekshon ha ki jylla bapher, la ju thep da ki byrni ia ki kot 2,000 ban ioh thied vote.
Kam dei tang katta, hynrei ki kot 2,000, ki dei ki kot tyngka, kiba uba rit ba ria, um ioh satia ban thep pla, namar ki dei ka dor kaba lada kamai shi taiew ruh ym pat ioh satia bad ki dei ruh ki kot, kiba shitom bha ban pyn kylla khutia bad kumta kiba bat ia kitei ki kot heh, ki dei tang kito kiba ioh ban pynlut kumba kawei, ne ar lane lai tylli kitei ki kot saw bthuh.

Ki kot 2,000, ki mih ha u snem 2016, hadien ba U Narendra Modi, u pynduh ia ki kot 1,000 bad ki kot 500, ba la don lypa ha iew, ha ki phew phew snem ba ladep bad ka daw, ka long halor ka jing sngew thuh jongu, ba ki don bun bah, ki briew kiba buhrieh pisa lane kata kaba ki ong black money; hynrei kaba lyngngoh, ka long ba ynda haba la ia khein ia diah, ia kitei ki pisa, ba ki wan bun pynban, na kaba la khmih lynti bad katei ka pyni, ba ka jingthmu ban wad ia ki nong pyniaid pisa tuh, kam trei kam satia, ha kaba la antad, ba kaba bun bah, kan dei ha iing ka Sonia lane ha iing U Rahul Gandhi.
Ngim iakren jrong ia katei ka mat, hynrei, ka jing pynduh pisa ha u snem 2016, ka la dei ka jingduh kaba khraw ia u paidlang ka India, ha kaba ka pisa kaba don ha la ki iing, la shu bret kai sha ki jaka bret niut (khamtam sha ki nongkyn dong) bad katei ka la ktah ia ka ioh ka kot jong kiba bun ki nongshong shnong bad kaba kim pat lah satia, ban khyllie bai duh, haduh ha kine ki sngi ruh.

Ka jingweng noh jong ka RBI, ia ki kot 2,000, ka pyni shai, ba ka jingthmu jong ka sorkar ban weng ia ki pisa, ba la don lypa ha iew, kam shym long satia kaba jop, hynrei ban buhrieh ia kata, la shu weng noh suki suki na iew bad ha ka jaka, ban pynmih biang ia ki kot 1,000, la sdang ban pharia ha kine ki sngi, da kaba pynmih ia ki kot T.200, ki kot T.50 bad kiwei; hynrei kane ka jing pyni dur ia ki kot pisa bapher, kam don jingmut, namar ba ngi donkam ia ki pisa kiba lah ban tyllun ha iew man ka sngi bad kam dei tang katta, hynrei, ban pynmih ia ki kot tyngka ha iew, kam shong ruh ha ka jingmut u politician, hynrei, ka dei ha ka jing shemphang, ki stad ha ka ioh ka kot lane ki economist.