Ha ki por elekshon, haba ki kyrtong ki ju pan vote na ki paidbah, ka ju wan bha ka jubab, na kiba bun ki longiing bad kata ka long, ba u kpa un kyrshan ia uwei u kandidet, ka tnga ia uwei pat bad ki khun ruh kin kyrshan kat shaba ki sngewmon.
Ym tang katta, ka la long sa ka jinglalot tasam jong kiba bun, ha kaba nalor katei ka jingmynjur, ki da buh dor, sa ia ka bai thep vote, ha kaba ki khein dor ia ka bai kali, ka bai sngi, ka bai sha bad ter ter.
Na kiba kum kitei ki nongthep vote, ka wan pat sa kawei ka jing shisha, ba ynda haba u kyrtong uba u kpa u kyrshan, kumta utei u juh u kpa, un leit pan jingiarap, na bynta ka tnga, na bynta ki khun bad haba kumta, ka wan ka jingsngew pohjait kaba palat than, ba haba dang dei ka por thep vote, un phla hi ma u, ba um lah ban pynbor ia ka lok ban kyrshan ia utei u kandidet bad wat ia ki khun lajong ruh, katba ynda ula jop pat u kandidet jongu, un leit ialam ia ki khun ki tnga, ban pan jingiarap na u kandidet uba jop bad kam dei tang kata, hynrei ula klet ruh ban kynmaw, ba ula dep ai ia la ka jong ka vote, da kaba ioh ia ka bai sngi kaba biang, ka bai kali bad ka bai bam ruh de bad ka jubab ka long ba kumno “Un leit pan jingiarap, na u kandidet, uba u la dep ioh da ka dor kaba biang, na ka bynta ba un leit thep vote” lane ha kawei pat ka kyntien, ba lada um lah ban pynkohnguh ia ka tnga bad ia ki khun, ba kin kyrshan ia u kandidet, uba iahap ma u, kumno un da jop pat, u lah ban pynkohnguh, ba kin leit pan jingiarap bad kumno, ba ka jinglehrain kam ktah ia ka jingmut jingpyrkhat jongki?
Haba iakren ia kane ka mat, kam thew eh ia ka jing ia sam vote jong ki longiing longsem, ha ki por elekshon, hynrei, ka don kawei ka mat, kaba hap ban ia tai bha bad kata ka long ba u kpa, uba dei u khlieh jong ka iing, u don bor ne em ban pynbeit ia la ki khun ki tnga, ha ka por jong ka jingialeh, lane ioh ba u donbor ban teh lakam ia la ka jong ka iing, tang ha ka por, ba leit thap jingmyntoi na ki nongmihkhmat lane ha kawei pat ka kyntien, ba u kpa, um kwah satia ban tehsong ia la ka iing, ha ka por trei, hynrei u kwah ban pyni, ia la ka jong ka bor kpa, tang haba la dei ban kheit soh.
Kane ka jingmlien, namarkata, kam dei satia kaba bha, na bynta ki longiing longsem, ba kin ailad ban ia pharia haba don ki mat kiba dei ban iakren ia ka thain, ia ka Consti tuency lane ia ki ishu kiba kongsan jong ka jaitbynriew.
Kam dei tang kata, la ju lap bha ruh, ba ha kine ki sngi, ki nongthep vote, kim ju kwah ban iakren ia ki ishu kiba ktah ia ka shnong, ia ka thain jongki, hynrei ki kynrup stet beit tang ia ka pisa bad katei ka dei ka jinglong kaba sniew tasam, ha kaba ki briew ki pyrkhat beit tang ialade shimet bad kim tip, ba ka kam nongmihkhmat, ka dei na ka bynta ban pyrkhat ia ka san snem bad ia ka pateng ka ban sa wan, kaba dei na bynta ki khun ki ksiew jongki hi.
Phi don ban ong eiei?