Noh synniang ka Namdong, sha u kyrtong lajong ban ialeh MLA

Ha kine ki sngi, ngi iohi, ba ki Syiem, ki Sirdar bad ki Rangbah shnong, ki shah khyrwait tdong ha ki seng sain pyrthei bapher lane ha ki MLA kiba jop, na ka daw, ba kin shim kabu, na ka kam synshar Shnong, ban kamai spah ialade bad katei ka dei ka jinglong kaba da ijli tasam bad la iohi ruh ba ha ki rynsan elekshon, ki Rangbah Shnong, ki Sirdar ki ieng ialade ha khmat ha khmat, namar ba ki buaid mithai.

Hynrei ka khubor jong ka shnong Namdong A, ka dei kaba ai mynsiem pynban ia ka synshar paidbah ba shisha bad kaba nylla bad kata ka long, ba ka dorbar shnong, ka ialum lang ban sei synniang kaba T.2lak sha u kyrtong trai shnong, U Ma Dawan Lyngdoh, u ban iakhun pyrshah ia U ma Sniawbhalang Dhar na ka Nartiang Constituency.

Katei ka pyni, ba ka dei pynban, tang ha katei ka shnong, ba U Rangbah Shnong, um shym shah khyrwait tdong lane um shah samkhmut ha U MLA uba jop lane ba um kwah satia ban kamai spah ialade, na ka bynta ban ai burom ia u trai shnong lajong, da kaba un kyrshan tyngeh, ba un jop ia ka elekshon MLA.

Kane ka bih buaid elekshon jong ki Sirdar/Rangbah Shnong, ka dei kaba ma bha shibun, namar ba lada ka don ka jing ia pynbam pisa ban thep vote na ka parti ba ki kyrshan, kumta kin khap ia la ki jong ki khmat; lada ka don ka jing iashoh iadat, iania iamai, na bynta ka elekshon, kumta ki hap ban kyrshan sha ka liang lajong bad la ju lap ruh, ba haba leit iuhkjat ki kyrtong ba ki kyrshan, ki leit bud tdong syndah syndah, katba lada dei kiba ki ia pyrshah, ki phetkrad ialade lailum lai wah bad kane ka jait jinglong, ka pyn iajot shi shnong bad kum kine ki riew khwan lanot bad ki thliem kjit snam jong u paidbah, kim bit hi ruh ban neh slem, ha ka synshar shnong synshar thaw.

Ka Village Administration Bill (VAB) jong ka KHADC, kaba dang dei ban ioh jingmynjur na U Lat ka jylla, ka dawa ia ka jinglong pdeng jong ki Sirdar, ki Syiem, ki Rangbah Shnong, ha ka kam sain pyrthei bad lada katei ka ain ka treikam, kumta kin bun ki khlieh nongsynshar, ki ban hap shong madan.
Wei ba la jan ka elekshon, ka la dei ruh ia ki bor District, ba kin pyrman bha, kum ia kitei ki briew, kiba dei ki jynrein kiba pyntroin ia ka jingkhuid ka synshar paidbah.