Ha kine ki khyndiat snem ba ladep, haba ngi peit bha, ngi iohi, ba ka sorkar jylla, ka tieng pleng tang ia kiba khlain bor bad kam pushe eiei ruh em ia kiba tlot bad kiba iaid marwei bad ban pynshisha ia kane ngi iohi, ba haba kawei ka longkmie, ka nud ban leit shah thngan ha Secre teriat, ka ioh jingmynjur ban shna surok, nangta haba u heh seng sain pyrthei, u leit shah thngan, u lah ban pynkhih ia ka bhah kam bhah jam, nangta haba ka KSU, ka pyni bor, ki mih ki marks ialeh eksamin jong ka MPSC bad haba ki nongtrei SSA, ki iakhih, ki mih ki komiti bad ki jing iakren, na bynta ki jingdawa jongki.
Kim dei tang kita, ki don bun kiwei pat, ba kynthup ia ki nongshet ja sngi, ha kaba ki nang heh tulop, na kaba ki pynllong iakhih, ki ASHA, kiba shah thngan, ki nonghikai, ki nongtrei 108 bad sa shibun kiwei pat.
Ka phang pat kaba dei ban iakren hangne, ka long ba lyngba kine ki jingsneng, ka la dei ia kito kiba trei shipor ha ki ophis sorkar, ba kin sdang noh ban ia thaw seng bad ynda ki la rung khlieh ialade, ba ki dei ban pynduh jait ia kine ki kam thombor bad ki kam shim kabu, kiba jia bha ha ki tnat bapher.
Ka nuksa kaba paw shynna bha, ka dei halor ka jingkhot ia kitei ki kam kiba shipor bad pynbna iar ha ki kotkhubor bad ynda peit ia ka bai siew, ka long ba kin khot ia ki doktor, ki engineer, ki stad kot, ki stad khein jingkhein bad ka tulop, ka dei kaba T.8 haduh T.10 hajar shibnai bad katei kam iahap satia, tang ia ka jingsiew kaba dei ia ki nongbylla lane ki skilled labour, hynrei kitei ki tnat sorkar, kin tyrwa ia ka dor kaba poh tam, katba ka kyrdan kaba heh tam.
Kane ka jingjia, kam dei shuh, tang ha kawei ka tnat sorkar, hynrei ki la bun bah, kiba kum kine bad kiba la ju tip kum ki ngi lah ban khot, ha kaba ka jingpynbna, ka dei kaba heh bad kaba iar, nangta ka jingpynlong ia ki interbiw, kaba la ima bad kaba bniah thik pa thik; katba ka jingsiew, kan long hapdeng ka T.10 haduh T.20 hajar bad nangta sa ka jaka trei ruh, ka don shajngai bah bad ynda ia khein tang ka bai kali ruh kam mih.
Hynrei, haba peit na kine ki jing ia pyni bor kiba iai jia na ka por sha ka por, kumta ka la dei ia kine ki nongtrei shipor, kiba jyllei bah bad kiba don ha ki tnat sorkar bapher, ba kin ialum lang noh bad thaw ia kawei ka seng bad dei lyngba jong kane ka seng, kin dawa ban kylla long sha ki nongtrei ba pura bad tang shu nud ban iakhih paidbah, da kaba shong kyllain myngngor, hangta ka jingsngewlem bad pynshlur, kan sa mih na ki kynhun bapher bad hangta ka sorkar jylla, kan sa khot ban iakren bad tang shu la iakren, la thikna ba ka jingheh tulop, ka la ap lypa.
Ka sorkar jylla, ka la dei ruh ban sangeh noh ia kane ka jingthung kam shipor, ia ki briew kiba don ia ka kyrdan kaba biang kum ki doktor, ki engineer, namar ba kane ka jingleh, ka long pynban, kum ka jingriam ruh ia ki, ba kin shu trei shi trei shipor bad ynda ki la kut ka rta wad kam jongki, kin sa shah kyndang noh bad kumta kin hap shong khlem kam ha ka jinglong tymmen jongki.
Phi don ban ong eiei?