Ngi la duh ia u nongialam ba ki ieid

Ban jop elekshon na ka bynta hynniew sien kynthih, kam long kaba suk, khamtam ha kaba kum kane ka juk ia beh pisa bad katei ka jia sa tang ha U Dr Donkupar Roy, MLA jong ka Shella bad hadien jong U bah HS Lyngdoh, MLA barim, uba la khlad noh ha ki khyndiat snem mynshwa.

Bun kiba kylli ia kiei ki kam, kiba U Dr Roy, ula noh bynta ha ka Constituency lane ha ka Jylla hi baroh kawei, kum U MLA; hynrei ka jingshisha ka long ba utei u nongialam, u kham duna ka lad ban don ha ka sorkar, namar ba u don ha ka seng trai ri bad ba baroh shi katta, ka ju snoh rdin ka Congress ha ka bor synshar ha ka Jylla jongngi.
Kane ka dei ka sien nyngkong, ba un long kum u lamphang dorbar Jylla, hadien kitei ki hynniew sien, ba ula jop bad ula long myntri rangbah ruh tang shisnem bad nangta ula long nongialam liang pyrshah ha ki san snem ba ladep, ula long u lamphang jong ka State Planning Board bad ula long myntri rangbah ba ar bad sa kiwei de ki kam kiba ula shimti, wat la um don lad ban khlieh ia ka jing synshar ha kine ki 30snem tam, ba ula don ha ka kam paidbah.
Wat la ki don kitei ki jingeh, hynrei U Dr Don, um shym la shah kyntait satia ha u paidlang jong ka Shella Constituency bad ula iai jop, lane u iai ioh ia ka jingieid jong katei ka Constituency bad katei ka dei ka mat lane ka phang, kaba ki nongialam ha kine ki sngi, ki dei ban peit bha ialade, lane ba kin pyrkhat ba kumno utei u rangbah, u iai bteng ban jop elekshon, haba kiba bun pat ha kine ki sngi, kim ju lah ban shan slem.
Lait noh U Dr Don, lehse, uba jop bunsien eh haduh mynta, u dei sa tang U Mukul Sangma, uba dei u nongmihkhmat jong ka Ampati Constituency bad katei ka pyni, ba kiba bat ia katei ka nam, kim don shuh mynta ha Khasi Jaintia Hills.
Khlem pep ka kam shakri paidbah, ka donkam namarkata ia ka jinglong khuid, ka jinglong shisur bad ka jingtrei hok ia ka kam, lane ka jing bym pyn iakhleh ialade ha ka kam mihkhmat paidbah bad ka kam khaii bad nangta ki don shuh sa kito kiba mihkhmat bad pyn khie spah ialade bad ia la iing ka sem bad kitei ki dei ki khyndiat ki nuksa, ha kaba kam ju kham jia ha ki nongialam kiba rim jong ka Jylla.