Nangtlor ka jingkhlain bor, ka BJP ha India

Ka result jong ka elekshon dorbar jylla, ka dang shu mih shen bad la iohi, ba ka BJP, ka la jop kput ha Gujarat, hynrei, ka la duh noh ha ka Congress, ia ka Himachal Pradesh, ka jylla, kaba ka synshar hi ma ka bad kam dei tang katta, hynrei, ka la duh noh ruh ia ka elekshon jong ka Municipal Corporation of Delhi (MDC) ha ka seng AAP bad nangta, ka la rem ha ki 5tylli ki elekshon shiteng samoi sha Lok Sabbha, katba ka jop tang ar tylli.

Na ka bynta ki riew ieid BJP, ki lah ban nym da sngew khuslai than ia kata, hynrei, lada khein ia ka jingkhein jong ka vote sha ka elekshon Lok Sabbha, katei ka pyni, ba ka BJP, ka la hiar arsut shibun, ha kane ka kynti.
Ki don shibun ki daw, kiba pyntlor ia ka seng BJP bad kawei na kita, ka long ka jingkiew dor ki marbam mardih, ka jingkiew dor ka khajna, ia ki mar ba kongsan, lyngba ka jingdain kuna ka GST bad nangta, ka jingthombor ia ki rit paid, kum ia ki Khristan, ki Muslim bad nangta, sa ka jingthmu ban nion jubor ia u paidlang ka Ri, lyngba ka Uniform Civil Code (UCC).

Haba kren ia kane ka mat, hap ban sngewthuh, ba ka ishu niam, kam dei satia ka kam jong kano kano ka seng sain pyrthei, hynrei ha ka seng BJP, la iohi, ba ka kham shyrkhei pynban ma ka, ban ia ka kynhun niam hindu lane ia ka kynhun niam Muslim bad ka thaw ia ki ain, kiba pynbha tang ia ki Hindu, katba ka nion, da ka bor ia ki rit paid Muslim bad ia kiwei ki kynhun niam.
Ka elekshon Lok Sabbha, kan long sa tang shisnem tam bad lada shu peit na kitei ki dak ki shin, kiba paw, la iohi, ba ka BJP, ka la sdang duh jait ha Delhi, ha Himachal Pradesh, ha Punjab, ha West Bengal, Tamil Nadu, Bihar, Kerala, kiba dei ki jylla kiba kham heh bad kumta, kan dei ka jingiakhun kaba jwat bha, ba katei ka seng kan dang wan phai biang ha u snem 2024.

Ki nongialam jong katei ka seng, ki la dei namarkata, ban duh thiah duh dem bad ban peit bha ia ki kam ba ki trei, la ki dei kiba larkam ne em bad ki la dei ruh ban pynlut por ban wan rah ia ka roi ka par, ban ia kaba shim kabu, ha kaba pynkhie spah ia ki Ambani, ki Adani bad ki Poonawalla lane ban pynkhih tang ia ki ishu niam, kiba pynduh noh ia ka jingim bad long laitluid jong ki niam, kumba la ai bor da ka riti synshar Ri.