Nang kiew stet tasam, ki dor ki mur

Ka jingkiew ki dor ki mur, ka la nang kiew stet tasam, ha kine ki sngi bad ka dei kane kein ka por, ha kaba uba duk, ula kyrthat bad im sohsat, katba u heh spah, te u im kynjai sadhai.

Ha ki khyndiat sngi ba ladep, ka dor jong ka petrol, ka la tam ia ka shispah shi litar, hynrei kat haduh mynta, ngim shym la pyrwa ne khuslai eiei ruh em; ka bai kali, ka la dep kiew lypa, naduh ka por jong ka khlam corona; ka doh masi, ka la nang kiew dor wut shi wut bad mynta, ka la poi sha ka T.600 shi kilo, hynrei hangta ruh ngim ia salia satia (bad la iohi, ba ngi la sdang myllen ruh ban sangeh noh ka bam doh bad katei ka pyni, ba kam slem shuh, ba ngin sangeh na ka bam doh masi, namar ba ngim don pisa ban thied) bad sa ka dohsniang kaba kiew sha ka T.420 shi kilo bad katei ruh kam ktah satia ia ka jingsngew uba bun.

Kat haduh mynta, kaba ngi ioh tad, ka dei tang ia u khaw, ba ka ai sbun ka sorkar India; hynrei ngim tip, la u nongshong shnong ka India, u lah ban im ne em, tang da u khaw shibeit, namar ba mangi ha Ri Khasi te, ka jinglut, ka bun shah, haduh ba ngin ioh ban taw ia shikham ka ja.
Kane ka jingjia, ka la ktah jubor mynta ia u duk u suk, namar ba ka kamai kajih, ka la hiar shaba palat liam, ka ioh ka kot, ka la hiar tyngeh bad ka jingduk ksew, na ka jingwan ka khlam corona, ka dang iai bteng bad ka dei kane kein, ba kan pynlong ia u briew, ba un bam tang ban kdang, lane bam da ka ja suda bad ka um ruh ym banse, namar ba ka jing ioh bylla, kam iahap tang mar shiteng na ka jinglut, ha kaba thied ia ka bam ka dih, khlem da iakhein shuh, lada ka wan ka pang ka shitom.

Ka sorkar India lane ka sorkar Jylla, kim shym la leh eiei, na ka bynta ban iarap ia u paidlang ka Ri, ha kine ki sohsat, kiba ngi la mad ha ki arsnem shiteng ba ladep bad mynta, sa ka jingwan jong kane ka thma bad ka jingkordit jong ka pyrthei, ngim tip ia kaei ka lad kaba kin buh ha khmat, ban pynim ia u luk u lak; hynrei haba shu peit, la iohi, ba ka sorkar bad ki heh ki hain, ki im pahuh pahai bad kim don jingpyrwa eiei ruh em.
Katba ka jia, ngi lah ban donbok ne sniewbok, ba ka sngi bishar, ka la jan poi bad hangta u paidbah (lehse) un sa stad ban pyn iakhlad, ia u kba bad ia u khaw.