Nang kiew kiba iap corona ha ka jylla

Kiba iap corona, ki la nang bun ha kine ki sngi bad la iohi, ba ki la poi sha ka 15, 20ngut antad ha ka shi sngi bad kane ka dei ka jingiap, kaba la bun bha, haba ia nujor ia ka jingdon briew ka Meghalaya, kaba don tang 30lak ngut antad bad nangta sa kiba ioh pang, la iohi, ba ki la poi sha ka 700, 800ngut ha ka shi sngi bad nangta, ba ha kane ka kynti, ki la saphred sha ki shnong bapher jong ka Ribhoi bad ka Riwar ruh kumjuh, kiba la tip, kum ki jaka kiba shit ha ka por lyiur (khamtam ha kane ka por duna slap).

Ka jingpang khlam corona, ka la hiar shi katdei haduh u bnai, uba ar, ba lai jong une u snem, ha kaba ki la don kai, tang iwei, ar lane lai ngut ha ka shisngi, hynrei, ka la shu kiew kynsan, ha u bnai, uba saw bad uba san bad ka jing kylli, ka long ba naei kein, ka wan shop kyndit biang kane ka khlam, ha kane ka snem?
Myn shem snem, ngi kynmaw, ia ka jingkhlad U Dr Sailo bad nangta, ba ki don sa kiba bun kiwei pat, kiba ioh ia ka jingpang, na katei ka iing bad na ka hospital; nangta, ngi kynmaw ia kiba leit iathoh sha Guwahati, kiba long sa kawei pat ka daw, kaba la pyn khynniuh rih, ia ka nongbah Shillong, namar ba ki la ia sapra na kawei ka jaka sha kawei pat; hynrei mynta u snem, kum kitei ki nong pyn saphred, kim don satia, lait noh, kito kiba wan na shabar, lane ki returnee, kiba la shim, ba ki dei kiba wan rah ia katei ka jingpang khlam corona.

Mynta kaba ngi iohi, ka long, sa ka jingbun jong kiba iap bad kaba pyn pyrkhat ia u paidlang ba bun, ka long ba ki briew ki iap, haba ki don tang ia ka jingpang corona bad na ka jingkhein, jong ka tnat ka koit ka khiah, lah ban iohi, ba tang ha ka shi sngi, ha ka sngi balang, ba ki don da ki phew ngut, kiba iap beit, tang halor ka jing don covid positive lane covid pneumonia (ka jingpang shit) bad katei ka dei ka jing iapher, namar ba ha u snem ba ladep, ym don satia kiba iap, kiba don tang ia ka jingpang corona, lada jia ba kim don sa kiwei pat.

Ka jingjia, ka ima shi katdei, namar ba kawei ka dei na ka jingwan jong ka khlam corona bad ha kawei pat ka liang, ba ka dei ka por jong ka jingpang khieshoh, ha kaba ngim lah lait na ka khieshoh rih (malaria) lane ka dengue ruh lehse bad ki doktor kiba peit corona bad kiba ju sumar khieshoh, ki la dei ban duriap bha, halor ka jingiap kaba nang kiew stet artet.