Nang khluit tar, ka thma poh iing ka Congress

Ka thma poh iing jong ka seng Congress, ka la nang khluit tar ha kine ki sngi bad katei ka la nang paw shai, haba U Mukul Sangma, ula nang pynkhreh, ban kad arliang wak ia ka seng Congress.

Ngim tip, la u lah ne em ban leh kumta, hynrei ka jing shisha, ka long, ba haba la ailad ia uwei u briew, ba un kam trai ia kano kano ka parti bad ba ki la dap da ki khun ki tnga, ki hynmen ki para jongu, ula sngew khlain bor, haduh ba ka jingmut, ka long, ba katei kam dei shuh ka parti jong ki paidbah, hynrei ka dei ka parti jong ka iing jong u hi shimet.

Ka mat, kaba ngin iakren hangne, ka long ba balei U Mukul Sangma, u da shun thlong mluh thlong sying ia U Ma Vincent Pala, ba un shimti ia ka kam nongialam jong ka seng Congress. Une u juh u briew, ula thawlad tyngeh ban pynrem ia U Ma Pala, ha ka elekshon MP 2014, hynrei, um shym la lah bad hadien kata ruh um hun satia bad u dang iai bteng ban ijli sat ia U MP.

Ka lah ban dei ba U Mukul, u shim ba U Ma Pala, un knieh noh ia ka jingthrang shuki myntri rangbah jongu, ha ka snem 2023; hynrei katei kam pat poi satia shata, namar ba wat tang ka elekshon ruh kam pat long bad lada ka long shisha kumta, ka lah ban don ka jing shisha khyndiat, namar ba U Ma Pala, u dei u dkhot jong ka Lok Sabbha bad u dei ban ailad ia ki MLA, ba kin jied ia la u jong u nongialam.

Hynrei katei ruh kam da don nongrim kaba khlain, namar ba U Conrad Sangma, ruh, u dei hi U MP, hynrei, u long myntri rangbah bad nangta U Sarbananda Sonowal (ha Assam), u long tang U MLA, hynrei, u long myntri ha ka sorkar India bad kitei ki dei ki jingkhein jong ki politician.

Khyndiat taiew mynshwa, U Mukul Sangma, ula kren sngewkhia halor ka jing pyn iapher hapdeng ki Khasi bad ki Garo bad u da jaw ummat hi ruh bad katei ka pyni, ba haba u ialam ma u, ia ki MLA Khasi, kim ju mih ki ummat na ki khmat jongu, hynrei haba u don jingthmu, uwei pat u rangbah Khasi, ban shimti ia ka kam nong ialam, kumta ki ummat ki tuid shait shait na ki khmat jongu bad katei ka pyni, ba ia kaei kaba u long ma u ban ialam, kam long ia kiwei pat.
Ban pynkut, ka Congress, ka la dei ban kyndit thiah bad kata ka long ba ka kam politics, ka dei ka kam paidbah lane ba kam dei ka kam jong kawei ka longiing.