Nang khlain bor ki Taliban ha Afghanistan

Ka America, ka la mih noh na Afghanistan, hynrei, mar ia mih katei ka Ri, kaba la hiar thma ia ka Afghanistan (20 snem mynshwa), la iohi ba ki ehrang Taliban, ki la nang khlain bor shuh shuh bad mynta, ki la nang ioh kurup ia bun bah ki shnong, ki thaw, ki nongbah jong katei ka Ri.

Ki Taliban, la ju tip, ba ki dei ki paralok, kiba iajan bha bad ka Pakistan bad kumta, haba ki Taliban, ki khlain, ka pynkhlain bor ia ka Pakistan bad haba ka Pakistan bad ki Taliban, ki nang khlain bor, kumta, ka buh ia ka jing shong syier jong ki khappud jong ka India, lada dei ha Kashmir lane lada dei ha kiwei pat ki sawdong pud bad ka Pakistan.

Ka India, ka sngewthuh bha ia ka jingma, kaba ap ia ka, na ka jing kiew stet ki Taliban; hynrei ym tang kata, ka India, ka la bei tyngka, haduh 3 billion dollar, ha kaba ka la tei ia ki 400 tylli ki projek bapher ha ki 34 tylli ki jylla jong ka Afghanistan, hynrei, la iohi, ba kitei ki projek, kin sa jot thiaw, ha ka jingshah pynhiar kput ha ki Taliban, lane kitei ki kam pynroi, kin sa ioh lad ban kamai spah ne pyn myntoi pynban ia kitei ki ehrang.

Kam dei tang kata, hynrei ka khaii pateng, ka dei sa kawei pat ka bynta, kaba ka India, ka kamai pisa ha katei ka Ri, namar ba ka shalan ia bun bah ki dawai, ki tiar shna iing bad kiwei kiwei.
Na kaei kaba paw ha kine ki sngi, ngi iohi, kumba ka India, ka don ha ka jing ia tyngkhuh bad ki nongshun jongka, lada dei ia ka China, ka Pakistan lane mynta sa ia ki Taliban jong ka Afghanistan bad kine ki jingjia, ki la pynkhih jingmut ia ka India, ha kaba u myntri bar ri jongka, u hap ban leit wad paralok sha ki Ri ba marjan jong ka India, lada dei sha Russia, sha Tajikistan bad wat sha ki ehrang Taliban, ban nym mih ka jing ia pyni bor bad ka India.

Ka Pakistan, lane ki Taliban, ki iai wad daw, ban pynhiar kput ia ka India, halor ka ishu jong ka Kashmir; kumta, mynta lyngba kine ki jingjia, kiba jia ha kane ka thain, ka la dei ia ka India, ba kan pyrkhat ban nym leit tuklar ia ka kam poh iing jong kiwei ki Ri, hynrei ban ia long paralok parajor bad ba kan nym mih ka jing pynthut ia ka shongsuk shongsain jong u paidlang ka Ri bad wat ia kito kiba don shabar, kiba la shah peit khmat (kumba ka la jia ia kito kiba don mynta ha Afghanistan).