Nang jubor, ka shalan tuh dewiong ha ka jylla

U myntri ka sorkar India, uba peit ia ka tnat par dewiong, ula iathuh ha ki khyndiat taiew ba ladep, ha ka iing dorbar jong ka Parliament, ba ka jingtih bad shalan dewiong, ha Meghalaya, ka la sangeh la saw snem kynthih.

Mar ia iohi ia katei ka jubab, ki la mih bun bah ki jingkren pyrshah, namar ba ki shim, ba katei ka jubab jong u myntri, kam iahap satia bad ka jingshisha, kaba jia ha madan bad ia katei, la nang pynshisha shuh shuh, ba ka don ka jingthok jing shukor, ia ka sorkar India, namar ba dang khyndiat sngi mynshwa, ula iap sa uwei u nongtih dewiong ha Shallang bad ynda haba la kem ia u trai par, u iathuh, ba ula ioh sei dewiong haduh 8ton na katei ka jaka bad katei hi ka kren shai, ba ka jingsei dewiong kam sangeh satia.

Ka mat ka dei kaba eh than, ban iakren, namar ba ka ktien bad ka kam, kam iahap; hynrei ha kajuh ka por, ngi lah ban pdiang, ba ka sorkar jylla, kam lah satia, ban leit rung sha kawei pa kawei ka krem dewiong; tangba lada ka jia makna kumno kumno ruh, kaba ka sorkar jylla, ka lah ban teh lakam, ka dei ha kaba shalan ia utei u mar pohkhyndew, namar ba ia utei u mar, yn hap ban kit na ki surok bah bad ban die shabar jylla bad kam dei tang katta, hynrei ki donkam ki challan kiba biang, na ka bynta ban pyniaid iew.

Lyngba ka jingjia ha Shallang lem bad kiwei ki jingjia ha East Jaintia hills, ka la nang pynshai kdar, ba ka jingtih dewiong, ka iai bteng haduh ha kine ki sngi bad ba kito ki trok, kiba la sop bha ki met jongki, ki dei kiba kit dewiong lane kiba kit coke, kiba la thang hi na u dewiong.
Ka jingshisha, kumta ka pyni, ba ka don ka jingtuh tasam bad ka jingleh beain ia ka pisa jong u paidlang ka jylla, lyngba kane ka jing shalan tuh, ia utei u mar, da ki katto katne ngut, kiba lah ban pynmih ia ki shalan; kiba lah ban pynkohnguh ia ki pulit bad kiba ia don bynta lang bad ki sengbhalang bad ngim tip, la ka bor jong ka Supreme Court, kaba la buh ia ki kyndon kiba biang ban shalan ia utei u mar poh khyndew lem bad ka NGT, kin shu sngap man man, ia kane ka jingtuh pyllein pyllein.

Ka sorkar India, ka ju pyn donkam bha ia ka ED, ban tohkit, ia ki jing ialum pisa tuh bad ka la dei ban sdang ha Meghalaya, ruh, da kaba tohkit ia ka high level committee ki mahajon dewiong.