Nalor U MR, sa arngut ki SMR

U Conrad Sangma, myntri rangbah ka jylla, ula pynbam smai, ia arngut ki symbud myntri rangbah, ha kane ka sien bad kitei ki dei U bah Prestone Tynsong, na Khasi Hills, ha kaba ka seng NPP, kam shym la lah ban thaw pyrthei eiei ruh em, ha ka elekshon ba dang shu dep bad nangta sa ia U Ma Sniawbhalang Dhar, na Jaintia hills, kaba katei ka seng, ka la jop ha 3tylli ki Constituency.

Kaba kum kane ka jingbate symbud myntri rangbah arngut, ka la jia teng, ha ka por jong U Mukul Sangma (2013-2018), ha kaba ula pynlong symbud myntri rangbah, ia U Ma RC Laloo bad ia U bah Rowell Lyngdoh.
U Conrad Sangma, u pynksan ialade, da kaba ong, ba katei kam don jingwit ne jingpher eiei ruh em, ban don arngut ki symbud myntri rangbah; hynrei, lada ka long kumta, balei ba um jied symbud myntri rangbah sa uwei na Garo hills, haba ka dei ka Garo hills, kaba ai thaw sorkar biang ia ka NPP, da kaba ka pynjop haduh 18ngut ki MLA na katei ka thain.

Ka jingleh jong u myntri rangbah, ka long ban pyni da ki kam, ha kaba U Ma Sniawbha, un dei u khlieh jong ka sorkar sha Jaintia hills, katba U Bah Tynsong, un dei u khlieh sha Khasi hills bad ngin dang ia peit ia ki jingshisha, ha kaba kitei ki arngut ki symbud MR, kin don ia ka bor jong u myntri rangbah, na bynta ban pyniaid ia ki skhim ha ki District jongki bad ba kim da donkam shuh, ban ia syllok bad kiwei ki myntri lane kaba shai kdar, ka long ba ia baroh ki kam pynroi sha Khasi hills, yn peit tang U bah Prestone bad U Conrad bad kumjuh sha Jaintia hills, ha kaba yn peit tang U Ma Sniaw bad u myntri rangbah.

Katei ka dei ka khubor kaba shai bad kaba shynna bha bad ngim tip, la kitei ki arngut ki rangbah, ki sngewthuh kumno, ha ka jingsngew mynsiem jongki, lane ki nongialam ka jaitbynriew Khasi Pnar, ki sngew kumno lane ki heh jong ka seng synshar ka NPP, ki thew kumno, ia kane ka phang.
Lada kitei ki nongialam, ki sngewthuh ia katei ka buit jong U Conrad Sangma, ki dei ban tur sha kylleng ka Ri Khasi Jaintia bad ban pyniaid ia ki kam ki duk, khlem da buh mawpud ialade bad katei kan wan rah ia ka jinglong kawei jong ka jaitbynriew Khasi Pnar jongngi; hynrei, lada kane ka buit, kan dang iai bteng ha ki san snem ban sa wan, kan sa mih ka jingsngew ia jngai ha bun ki liang.