Ka Bangladesh, ka dei ka ri kaba dang khynnah shibun, ha kaba ka rta jongka, kam da iapher than bad ka Meghalaya, namar ba katei ka ri, ka ioh jinglaitluid ha u snem 1971, hynrei kaba i diaw mynsiem shibun, ka long ba haba katei ka Ri, ka la ioh ia ka iktiar ban synshar dalade bad ialade lane sovereign country, ka dap pynban, da ka jingiakynad ka jing ia pyni bor bad ka jingpynhiar kput hapdeng ki nongialam jongka.
Mar ia wan ka jinglaitluid, la synshar ia katei ka Ri, da U Mujibur Rehman, uba dei u nongialam jong ka seng Awami League bad u kpa jong ka Sheikh Hasina, hynrei utei ula shah siat iap noh bad hadien kata, ki sa mih shibun ki jingjia kiba i shyrkhei ha ka sain hima jong katei ka ri bad ka jingiakhun kaba kham jubor ha ka sain pyrthei ka dei hapdeng ka Awami League jong ka Sheikh Hasina pyrshah ia ka Bangladesh Nationalist Party (BNP) jong ka Khaleda Zia bad ka Zia, ka don mynta ha ka jingshah set phatok, naduh u snem 2018, halor ka jing kynnoh bamsap.
Kam dei tang ka Zia, hynrei ngim klet ba ka Hasina ruh, ka la shah set phatok ha u snem 2007, halor ka jingkynnoh ba ka dawa pisa jubor na ka kompeni shna bording, ha ka por, ba ka don ha ka sorkar ha ki snem 1996.
Kaba ijli than, ka long ba kine ki jingleh ki thew beit tang ban pynhiar kput ia kiba don sha ka liang ba ialeh pyrshah ha ka sain pyrthei bad katei ka don ia ka sakhi kaba shai bha, ba mar ia phet ka Hasina ha ka sngi nyngkong sha India, U President jong katei ka Ri, ula pyllait noh mar mar ia ka nongialeh pyrshah jongka, ka Khaledia Zia bad kine ki paw shai namarkata, ba kitei ki jingkynnoh, dei tang ki jing pynbudnam bad ki jingshim kabu ban khniot ia ki liang pyrshah, namar ban da dei hi ba ka don ka jingtuh kaba jubor jong ka Khaleda Zia, kumta U President katei ka ri, un nym jin da la nud ban shu pynmih hukum ban sei ia ka Zia na phatok bad kine ki jingjia, ki kdew shai, ba ki nongsynshar ha ki phew snem mynshwa, ki pha ia la ka jingim, ha ki ehrang, kumba la jia ia U Mujibor Rehman ha Bangladesh bad nangta sa ka Indira Gandhi, U Rajiv Gandhi ha India; hynrei ha kine ki sngi, ki lehnoh kim da shlur, katba ki la mih bujli sa ki riew sain pyrthei bad kitei pat kim shym la shim ia ka jingim jong kiba ialeh pyrshah, hynrei ki shu pynkordit ia ki, da kaba pynshong phatok.
Ka Sheikh Hasina, ngi lah ban ong, ba ka la pyntreikam da katei ka buit, ban khniot ia ki nongialam jong ka BNP ha Bangladesh, da kaba set phatok ia ka Zia bad shibun kiwei de ki khlieh jong katei ka seng bad ngi lah ruh ban ong, ba ha kito ki phew snem ba ladep, ba ka la lah ban khniot ia ki liang pyrshah, da kitei ki buit poh ba har rukom, hynrei kaba itieng iap, ka long ba kitei ki kam thombor, kim shan slem pleng, ha ka synshar paidbah, namar ynda haba u paidlang ka Ri, ula nang iai wad shi wad daw, kumta un da la kdang hi pdik halade, u sa jynrat da ka bor ia ka shuki, kumba la jia ia ka Hasina.
Kane ka juh ka buit ka la iaid ha kine ki sngi ha Pakistan, ha kaba uba jop u shong shuki, uba rem u shong phatok bad bun sa kiba phetwir sha kiwei pat ki ri bad kane kajuh ka dak, ka la nang iai paw ha India ruh, ha kaba ka seng BJP, ka ioh thaw sorkar ha u snem 2014, halor ka juh ka daw, jong ka jingbamsap jong ka Sonia Gandhi, ha kaba la kynnoh ba ka pisa tuh jongka, ka la shlei mam ha Swiss Bank; hynrei kitei ki dei tang ki kyntien kob suda, namar ba haduh ha kine ki sngi, ngi iohi, ba ka Sonia Gandhi bad ka iing jongka, ki don ha ka jaka thaw ain jong ka Ri India bad kim shym la shong satia ha phatok, kumba la byrthen da U Narendra Modi.
Phi don ban ong eiei?