Na ka shah khot hajir, sha ka shah bom lathi ki HITO

U nongialam jong ka seng HITO, ula shah khot hajir, ha ki pulit, ha ka Lah Sngi U Blei bad na kaei kaba ia ioh jingtip, katei ka jingshah khot, ka dei, na ka daw jong ka jingphong jainiong.
Ngim tip shai ia kata, hynrei ki pulit, ki la pynngat ia utei u samla, ha ki kyndon 41A Cr.PC bad ka 171/34 IPC.

Ka jingshisha, kan sa nang mih bad lada ka dei na ka daw jong ka jainiong, hangta ruh, u don u dak jingkylli, la ka jainiong, ka long beain ne em ban riam, ha kino kino ki kam paidbah, ki jingialang, ki jingleit iap briew bad kiwei kiwei.

Sa kawei ka mat, kaba ngi hap ban sngewthuh, ka long, ba ki sengbhalang, la ju tip, ba ki dei kiba pyrshah sorkar bad ki mat jongki, bunsien, ki ju long hi kumta bad haba ka long kumta, ki la dei ban shai bha, ba ki hap ban iatyngkhuh bad ki pulit, namar ba ki pulit, ki dei kiba hap ban teh lakam ia ka suk ka sain bad kiba don ha ka jingpyniaid jong ka sorkar jylla bad lada ka don ka jingleh pyrshah, ka jingkren pyrshah, ka jingiaid pyrshah ia ki kyndon jong ki bor District, ki kyndon jong ka sorkar; kumta ki nongialam jong ki sengbhalang, ki ju shah khot hajir, ba kin pynshai, halor ki jingleh ne ki jingkren jongki bad katei kam dei, tang ia uwei u nongialam sengbhalang bad ka dei halor katei ka mat ruh, ba ki nongialam, kiba la shah phrang bha, ha ki pulit bad ha ki ain jong ki pulit, ki ju kiew stet bha shajrong bad ki ju kylla long ki nongialam, kiba iohi jingieid bha na ki paidbah.

Ym tang katta, ki don bun bah, ki nongialam sengbhalang, kiba hap ban leit shah khot hajir, ban leit sha kashari man ka por bad ki don ki mukotduma kiba dang sah, wat ha ki phew phew snem, ia ki nongialam KSU, FKJGP ne kiba bun kiwei pat ki seng.
Kumta, lada ka jingshah khot hajir jong uwei u nongialam jong ka sengbhalang, ka pynlong ia ki dkhar ba kin khang dukan, lane ban poi sha ka jingiabom iatied lathi bad kawang lyer pynsatkhmat bad ban pynthut ia ka leit ka wan, ka iaid ka ieng jong kiba bun; kumta katei ka jingtrei sengbhalang, ka la bakla noh.

Ki sengbhalang, ki don la ka jong ka bynta, kaba ki kwah ban shakri ia ka jaitbynriew (wat la ki la bun palat ha kine ki sngi) bad ki don ruh shibun ki khep, ba ki la khanglad ia ki kam beain bad ki kam bamsap ha ka sorkar bad ka dei na katei ka daw, ba ki hap ban iatyngkhuh man ka por bad ka sorkar.