Na ka kyrduh ding, sha ka tyrkhong um

Nalor ka jingkyrduh ding tasam, ki mih sa kiwei ki jingeh ia u paidlang ka jylla bad kawei na kitei ka dei ka um, ha kaba ki tyllong um, ki la sdang tyrkhong ha kine ki sngi; kam dei tang kata, nangta sa ka jing bym thikna ka bor ilektrik, ka la pynsuhsat ia ki briew kiba tan um na ki pung bad kiba thied um, na ki kali kit um.

Kat shaba phi leit, ka mih ka jingiakren tang ia ka jingkyrduh um bad ki don ki longiing, kiba duh thiah duh dem, na bynta ka um bad don kiba pynlut pisa da ki hajar bad ki phew hajar, na bynta ka jingdonkam, ia ka um; hynrei kat haduh mynta, ngi iohi ba ki skhim phoitler jong ka sorkar Jylla bad ka sorkar India, ki shu long tang ki langsaitpap, ki bym myntoi eiei ruh em bad lait na ka skhim um jong ka Shillong Mawphlang, hynrei, kiwei pat ki skhim, la imat, kumba ki shu paw tang ka dur.

Kawei na ki skhim, ka bym larkam tam, ka dei ka Jal Jeevan Mission (JJM) bad ngim tip, la ka dei na ka jing bymlah ka sorkar jylla lane na ki kyndon ka sorkar India; hynrei, ha kiba bun ki shnong, ngi iohi, ba u nar um, te ula satah ha ki lynti shnong bapher, hynrei, u dei uba tyrkhong raw raw bad kat haduh mynta, ka don tang kawei ka jubab, ia u luk u lak bad katei ka long, ba ym pat don ba pyllait um.

Ka sorkar jylla, ka la dei ban iakren bad ka sorkar India, ba haba pynpoi um sha kawei pa kawei ka longiing, ka donkam ka tyllong kaba heh, haduh lai, saw shah, na kaba ju long; ka bor ding kaba khlain bad ban shu peit hi ia mynta, ngi iohi, ba ngim lah shuh ban shaniah ha ki wah rit, lada ha ki wah kiba tuid dalade; hynrei ngi la dei ban bud ia ka nuksa jong ka um Mawphlang bad da katei kajuh ka buit, ngi lah ban pyndonkam ia ka wah Umiam, ka wah Umngot bad sa kiwei ki tyllong um, kiba heh ban sam um pahuh sha ki longiing ha ka jylla.

Kaba sngew shutia sat, ka long ba ka sorkar jylla, ka nud, ban shim burom sha lade, ia kaba kum katei ka skhim bad nangta, ki don ruh ki MLA, kiba kam trai ia kum katei ka skhim kaba phlop bad ka la dei ka por, ia u myntri PHE, uba mynta, ba un shimkhia noh mardor ia kane ka kam, kaba ktah ia ka iap ka im, ka koit ka khiah, uba bun balang bad lada ki sorkar ba mynshwa, ki lah ban tan ia ka um Mawphlang, balei ba ka sorkar ba mynta pat kam lah?