Na ka jing duwai U Bishop, sha ka kren hindi ha dorbar jylla

Ha ka jingwan kane ka sorkar thymmai jong U Conrad Sangma, ki jingjia, ki tyllun kynsan bad khlem lah mutdur shuh, ha ki khyndiat sngi ba ladep bad kitei ki kynthup ia ka jingwan khah khah U Narendra Modi bad U Amit Shah sha ka nongbah Shillong, kaba la pynsuhsat ia ka leit ka wan jong u luk u lak bad nangta, sa ka jingshah duwai jong U Conrad Sangma ha u Bishop ha shwa ban bam smai bad nangta, sa ka jingkren U Lat ka jylla da ka ktien Hindi, ha iing dorbar.

Kitei ki jingjia, ki la buh ia ka jingeh kaba khraw, ban ia thew tarajur, ia kata kaba ki ong ka jinglong jingman jong ka synshar paidbah ha ka jylla ha kine ki sngi; hynrei, haba ka long kumne, hap kynmaw, tang ia kawei ka kyntien bad kata ka long “Mano bym ieid ia la ka jong ka tynrai?”.
Ban ia shai shwa khyndiat, ngi ia tip lut, ba ka ktien Khasi, kam pat dei ka ktien kaba la ithuh da ka sorkar India, lane kaba la ioh lad ban rung ha ka khyrnit kaba phra jong ka riti synshar ri bad ngi tip shai ruh, ba ki don ar tylli ki kyntien, kiba la ithuh da ka riti synshar ri, ka ka English bad ka Hindi.

Haba wan biang sha ka sobjek haneng, la dei ban sngewthuh halade, ba U Conrad Sangma, u ieid ia la ka jong ka jingngeit tynrai jongu bad ha shwa ban shimti ia ka sorkar, u leit shah duwai ha u khlieh duh ka balang Katholik bad kumta hi ruh, sa U Lat ka jylla, u ieid eh ia ka kyntien lajong bad haba u wan sha Shillong, (u long lem kum kiwei ki mahajon ha Iewduh), u kren da ka ktien hindi ha iing dorbar. Kam dei tang kata, ha Iewduh, ngi ki Khasi, ngim ju ujor ia u dkhar, u bym nang kren Khasi, hynrei ngi nang sngewbang ban pyndap ia kitei ki dukan dkhar bad ngim ju leit thied noh sha ki dukan Khasi.

Ban nang pharia, ia kane ka mat, ka la eh than ia ngi; namar ba ngim lah ban pynpep skul noh ia la ki khun, tang namar ba ka don ka jingpynbor ba kin shah hikai ia ka sobjek hindi, lane ngim lah ban mih noh na ka jingialang jong u myntri ka sorkar India, haba u wan sha Shillong, tang namar ba u kren hindi.
Halor kine kiei kiei, ka Parliament jong ka India, ka da buh ia ki nongkren, kiba tip lut ia ki ktien bapher jong ka India, namar ba ki don bun ki bym sngewthuh, haba kren da ka English bad hap pynkylla sha ki ktien shnong jongki bad kumta ter ter.
Ki dkhot ka VPP, ki la mih na iing dorbar jylla, ha ka sngi sdang jongka, na katei ka ishu bad kata ka long, ba kim sngewthuh ia ka jingkren jong U Lat bad to ngin kyrmen, ba ka sorkar India, kan iohsngew ia ka jingud jong kitei ki 4ngut ki MLA lane ba kan nym pynhiar kput pynban ia ka jylla, na ka daw jong kitei ki 4ngut; hynrei kaba ngi dei ban sngewthuh, kum ki nong ialam, ka long ba ka kam thawain, kam ju urlong noh, tang ha ka shisngi, khamtam haba ia tyngkhuh bad ka sorkar India.