Mynjur ki kharmetor, ban mih noh na them iew mawlong

Ha ka jing iakren ia ka ishu them iew Mawlong, la iohi ba ka jingsngew jong uba bun balang, ka shu long beit ban pyrshah ia ki kharmetor bad haba pyrshah, ka long ruh ban pyni da ka bor lane ban jynrat naphang bad katei ka jingsngew, ha ka ktien phareng, la ju ong, ba ka long emotional lane shu khih jingmut, hynrei katei kam iaid kam satia ha khmat jong ka ain.

U paidlang ka jylla, u dei ban sngewheh mynsiem, ba ki kharmetor, ki la kohnguh ban mih noh, na them Iew Mawlong, ha kane ka kynti bad ngim dei ruh ban haram, ia kane ka sorkar, kaba la kot ia ka jingstad jongka, ban pynkohnguh, ia ki kharmetor, ba kin mih na katei ka ktem, kaba khlain tam jongki bad ka bym pat ju don (na kiwei pat ki sorkar), ba kin don ia katei ka bor ban pyndem, ia ki kharmetor.

Ha kajuh ka por, ngim dei ruh ban pyn iakhleh lang, ia ka rai jongki kharmetor ban mih lane ia ka jing dawa jongki, ban ai jaka iing, kaba 200 square metre, ban tei ia ka iing paki dulan bad kiwei kiwei; hynrei ka rai kaba kongsan, ka long, ba ki la pyndem ha ka mon jong ka sorkar jylla, ba kin mih noh, na katei ka jaka, kaba ki la sah da ki phew phew snem antad bad ka dei ruh ia ka sorkar, ba kan ai jaka sah ia ki, sha kiwei pat ki jaka, tangba ia ka jaka sah ha ki iing bun mala ne ha i iingtrep, kata kan dang iaid ka jingiakren bad kaba ngi dei ban khmih lynti, ba ka high power committee (hpc) kaba la khlieh da u symbud myntri rangbah bad kaba la ithuh da ki kharmetor, ka dei ban don ia kata ka power jongka, kaba baroh ki liang, kin ia hap jingmut lang, kumba ki la iahap jingmut ban mih na katei ka ktem jongki.

Ki jingbyrngem na ki kynhun kiba bun, ki la don bad ki la iai don bad ki don ruh kiba la byrngem, ban leit ther da u bom, ha katei ka jaka sah ki kharmetor, hynrei katei kam lah satia ban pynkylla ia ka jingshong jingsah jongki, ha katei ka jaka bad mynta, haba ka khep, ka la poi ha katei ka rai, kaba kham shai; ka la dei ia ki nongialam sain pyrthei, ia ki sengbhalang bad ki riew paidbah, ba kin iai ap shuh sa katto katne por, ba ka jingiaid lynti, kan poi sha ka kaba kut, wat la ngi kyrmen, ba kan lah ban bteng hadien ka elekshon 2023.