Mih sa ka HYC, ban tuklar ia ka elekshon MLA

Hadien ka HITO, ka mih sa ka HYC, ban shim bynta ha ka jing pynshai paidbah, ha ka jingjied MLA 2023 bad katei ka dei ka dak, kaba ai jingkyrmen shi katdei.

Ka HYC, ka la rai ban hikai ia ki nongjied, halor ka mat, kaba ka ong “Rai Ehdaw Campaign” bad katei ka mat, ka dei kaba sngew shngiam shibun, ban pyni, ba sa kawei ka sengbhalang, ka mih shakhmat ban pyneh daw ia u paidlang nongthep vote ka jylla.

Halor kane ka mat, ka la dei ia ki sengbhalang, ba kin ujor sha ka tnat elekshon, halor ka jingjer kyrteng bakla, kaba man ka por, ia ka elekshon, da kaba pynlong ia katei ka kam, kum ka tamasa, namar ba ka jingjer kyrteng bakla, ka pynlong ia u paidlang ka jylla ruh, ba un shim, ba kane ka dei ka kam tamasa, kum ka kam ia bam khana, ia leitkai sngewbha, ia shim pisa bad kumta ter ter.

Ka por elekshon, ka dei ka por, ban shong pyrkhat, ka dei ka por, ban iasyllok shi iing shisem, ka dei ka por ban ia syllok shi shnong shithaw, ka dei ka por ban duwai bad ka dei ka por ba u paidlang nongjied, un peit biang ia ki jingiaid lynti jongki, ha ki san snem ba ladep bad ba un pyneh daw ialade, na bynta ka sien jied, ka ban sa wan.

Ha kine ki sngi, ngi la ngop, ha ki kam shongshit suda, namar ba ngim tip shuh ia kaei kaba la jia ha ki san snem ba ladep bad ba ki MLA, ki leh khyllung ialade, da kaba kren kynthah ia ki paralok ba ki iakhun pyrshah; hynrei ka dei ha kaba kum kane ka por, ba kin sei ia la ki jong ki report card, ban pyni ia ki kam, ba ki la leh bad ia kiei ba kin dang leh shakhmat.
Kumba la dep kynthoh, ba ka dei ka kamram jong ki sengbhalang, ba kin shim bynta shitrhem ha ka politiks bad ngin dang ap khmih lynti ia kiwei pat ki seng, lada dei ka KSU, FKJGP bad kiwei, ba kin mih shakhmat, ban tuklar hi noh ia kane ka kam, kaba la kylli jylbi ha kine ki sngi.

Ki sengbhalang, ki la dei ruh ban talasi ne tohkit ia ki nongtrei jong ki seng sain pyrthei, kiba rung sha ki shnong ki thaw bad ki dei ban pynjari da ka korphiw, tang la sdang dum ka miet, ban khanglad ia ka jingleit rung ki briew kiba nabar bad ba kin leit bret pisa sha ki paidbah, ha shwa jong ka sngi thep vote.