Mih pyrthei, ka kynhun ban iawer sha ka elekshon ba khuid ha u 23

Ka elekshon MLA 2023, ka la nang hajan eh bad la iohi, ba ki la don ki kynhun ruh, kiba iakren ia ka jingjied nongmihkhmat kaba khuid ba suda, lane kaba ki ong Clean Political Campaign, hynrei katei ka jing iakren, kan shu long tang ka jing pynsawa ha ri khlaw bad ka bym don jingmyntoi eiei ruh em, namar ba u paidlang ka jylla, u don ha ka duk tasam ha kine ki sngi bad kumta, un shu tur ruma bad tare kat shaba lap, na ka bynta ban ioh pisa thep pla ialade.

U paidlang ka jylla, u sngewthuh ba katei ka jingleh ka long beain, hynrei, um banse ban tare, ia kat kaba ioh, namar ba ka la ban ka jingduk tasam, na ka jingsniew ka kamai kajih, ka jingrem ki mar ki mata, ka jinghiar ka roi ka par, ka jingthut ka ioh kam ioh jam bad kam dei tang kata, hynrei, kaba i shyrkhei sat, ha kine ki sngi, ka long ba ka jingshim pisa, kam dei hi ruh, tang na uto uba ki kwah ban thep vote, hynrei, kin tare ia la ki jong ki kti, na baroh ki kyrtong kiba ialeh elekshon bad katei ka dei ka jing jaboh jong ka sain hima sima ha kine ki sngi.

Ka jing lalot pisa jong ki paidbah, ha ka por thep vote, ka la nang i triem shibun ha kine ki sngi, khamtam, ha kiba bun ki Constituency nongkyndong bad ka dei na kane ka daw, ba ngi sa ioh, ia ki nong mihkhmat, kiba khlem jabieng bad kiba stad tang ban lum pisa bad kamai spah ialade bad ka dei na kane ka daw, ba kam don kano kano ka dak pynroi ha kiba bun ki Constituency, ha kaba kam don ka ioh kam ioh jam, kim don ki hospital, kim don ki surok bad kim don ki umbam umdih kiba biang.

Ban pynduh ia kane ka jing lalot pisa ki paidbah, ka donkam, ka ain kaba khor shibun bad kum ka jingsdang, ka donkam ban ailad shwa ia ka ED lane ka CBI, ba kin sdang noh ban trei kam ha ka jylla, ha kaba kin khynra ia ki iing jong ki riew sain pyrthei, ki myntri sorkar, ki ophisar heh bad tang shu la sdang nangta, ka la mih lut, ka pisa tuh bad katei kan pynduh jait, ia ka jing pynbieit ia ki nongthep vote ha ka jylla.

Ka la dei ruh ka por, ia ka sorkar India, ba kan pynkylla noh ia ki kyndon jong ka MLA skhim bad kata ka long, ba kam dei shuh ban long ka skhim sam pisa shimet, hynrei, kan leit na ka bynta ban pynbha ia ki skul, ki hospital lane ki skhim kiba tei ia ka bha ka miat jong u paidbah.