Hadien ka jingsah lyngngoh, uba bun balang, halor kita ki high level bad kaba la pynlong ia U Conrad Sangma bad U bah Prestone Tynsong ban ia dukha mynsiem jubor, halor ki jingshah kynnoh bad kaba la pynlong ruh, ba kin pan jingtip, na ki riew paidbah ia kiei kita ki high level; hynrei mynta, ha shwa ka elekshon, la paw kyrteng hi bluit, u trai ka high level bad kata ka long, ba U Bah Gigur Myrthong, uba dei U MLA ka Mawshynrut, u la pynbna paidbah hi, ha ka jingialang ha ka shnong Umsohpieng, ha ka sngi nyngkong, da kaba u kam trai hi dalade bad ong “Ngi dei ki high level, ba wan rah skhim pynroi, ym ki mentuh”.
Sngewkmen ia ka jingphla jong U bah Gigur Myrthong, halor ka jinglong trai jongu, ia kata ka kynhun high level bad ha kajuh ka por, ka dei hi ruh, ban nym ia sahnud shuh, haba ula phla, ba u dei u trai jong ka high level bad hap shuh shuh ban pdiang (haba u la ong u trai), ba katei ka dei ka high level, ka dei, na bynta ki kam pynroi pynpar, ym ia ki kam tuh.
Kam lei lei; katei ka la biang bad ka la shai kdar bad ngin dang ia peit, ia ki jingphla, ha ki khyndiat sngi, ban sa wan, la kin dang don ne em; hynrei kumba ka paw mynta, imat, ki don pleng ar tylli ki high level; ha kaba kawei ka dei ia ki kam pynroi bad kawei, ka dei ka high level jong ki mentuh, lane kiba donkti ha ki kam khaii dewiong beain, khaii coke beain, khaii mawshun beain.
Kam kut ruh tang katta, hynrei, ha kajuh ka por, ka jingai syrnot dalade ialade hi, da U Bah Myrthong, kam da donkam eh; hynrei, u paidlang jong ka Maw shynrut bad jongka jylla hi baroh kawei, un sa bishar ia ki kam jong katei ka high level, namar, kumba ka paw ia mynta hi, kaba ki paidbah ki iatip bha, ka dei ia ka high level, ha ki kam khaii tuh dewiong bad (imat) kim pat ju ia tip satia, ia kata ka high level, kaba pyniaid ia ki kam pynroi.
Tang katta ka la biang bad ka la shai bad u paidlang ka jylla, ha kane ka elekshon, kaba mynta, ula sngewthuh, ba un shim ia ka rai ba u sngewbit bad la ki sngew iahap ne em, ban dang ailad ia kata ka seng jong ki high level lane ka NPP, kumba ong U MLA ka Mawshynrut, lane ioh lehse, kin kwah pynban, ban pynkylla noh ha kane ka elekshon, da kaba kin wad noh ia ki low level lane ia kiwei pat ki party, ki bym kam satia ialade kumta kita ki high level.
Lada ngi ki paidbah ngi matlah bad kyllut khlem pyndonkam ia ka jabieng haba jied ia u nongmihkhmat bad ia ka seng khlem pep kan wan ka nem sniew ha ka ri bad ka jaitbynriew. Ki ia rung politik ki business man dei ba ki ia kwah shim kabu ia ka jingbiej u paidbah nongthep vote namar shu pynbiej tang lai bnai shwa ka elekshon da ka dud bad ka ngap ka jingjop lah ioh lypa. Te kumta u paidbah u la dei ban sngewthuh bad shim ka jingkitkhlieh lada u dang jied ia ka pisa bym hok ha shwa ka ban jied ia u nongmihkhmat.
Shong suk gigur bnai ban wan ha u sing baroh baroh