Haba ngi iakren ia ka kyrteng jong ka Williamson Sangma State University (WSSU), ngim dei ban klet ia ka jingtrei shitom jong U Prof GG Swell, MP barim jong ka Shillong, uba la lah ban pynioh ia ka North Eastern Hills University ha Shillong, ha u snem 1973 bad ka kyrteng jong utei u rangbah, ka sah pyrto haduh ha kine ki sngi, ha kaba hadien jongu, ym don shuh mano mano ba lah ban wan rah sa kawei pat ka kolej ne ka University jong ka sorkar India, kaba peit kyrpang ia ka jylla bad ia ka dong shatei lam mihngi.
Kam dei ruh ba ngin klet, ba U Mukul Sangma, ula wan rah ia ka ain, ha u snem 2011, na ka bynta ka Williamson Sangma Technical University, lane kaba mut tang ia katto katne ki tnat jingpule bad U Conrad Sangma, ula shimti da katei kajuh ka ain ban pynkylla syndon sha ka State University.
Hangne ka wan ka mat kaba donkam bha bad kata ka long, la ka la don ne em, kano kano ka kynhun, kaba kren halor katei ka University, ha ki snem 2011, ba kin pdiang ne ba kin pyrshah lane ba kin dawa ban buh noh ha Shillong, ha ka jaka, ba kan don ha Garo hills; hynrei ha katei ka por, ym don mano mano ba phohsniew bad ki sngap jar bad iohthiah lyngngai.
Kam dei tang kata, hynrei ngim ju kynmaw ruh, ba kan don kano kano ka seng sain pyrthei, ka ban rah ia kane ka mat, ha ka por ilekshon, ban dawa ia ka University, Medical College ha ka nongbah Shillong bad wat ki sengbha lang ruh, ngim kynmaw, ba kin shim ia kitei ki mat; lait noh, na kaba dawa ban pynkylla ia ka NEHU sha ka State University; hynrei baroh baroh ia smiej beit ia kijuh ki ishu ILP, ktien Khasi, ishu mawpud bad ka Assam bad kiwei.
Mynta ki ia wohnia, ki ia ujor, ia katei ka rai shimet jong U Conrad Sangma (namar ba wat ka NPP ruh ngim kynmaw, ba kan don ha ki kular elekshon jongka), hynrei kitei ki nong ujor, ki nongkynnoh, ki dei ban kylli, ia la ka jong ka jabieng, la ki la buh shaei ha kine ki phew snem ba ladep (kaba long la 13 snem kynthih) naduh ba thaw ia katei ka ain da U Mukul Sangma bad kito ki MLA, kiba la don lang bad U Mukul, ha kato ka por, la ki la pyrkhat khia ne em ia katei ka mat, ba kan dei ka kam leh shiliang hapdeng ka Khasi, Jaintia, kaba don bun bah ki kolej bad ka Garo hills, kaba don tang khyndiat tylli ki kolej?
Namarkata, ka mih ka jingkylli, ia kito kiba ia pyrshah ia ki kolej na Ri Khasi, ba kin leit iasnoh bad ka Williamson University sha Garo hills, la ki la ju iakren ne em ha ki rynsan elekshon ne ha ki rynsan jong ki sengbhalang, lane ioh lehse, kiba bun ki la ngop ha ka bam noh bad ka bam hi, khlem pyrkhat shuh, ia ka lawei jong ki jong ki khun, ki ksew bad dei hangne, kein ba iakynduh syndon ha khohsiew lajong.
Ki bun ki bym pat klet ia ka ishu ia phiah MBOSE, ha u snem 2005 bad ia katei ka mat ruh, lada ym don U bah Paul Lyngdoh, uba risain na ka kam minister ha katei ka por, katei ka jingphiah MBOSE, kan nym urlong satia, namar ba ki Garo, ki pyneh hi tdiang, ha kaba ka la mih ka jingiakhih kaba jur bad kaba la shim ia ka jingim jong ki khyndai ngut ki samla, ha Tura bad ha Williamngar.
ki ba kwah pynioh mat neh tang ha garo hills,ngi mat sah bad ka nehu Kum ba lawanrah da I professor gg swel bamkwai hadwar u blei.