Mar ia rung dorbar, ki ksiang ka jaitbynriew ki la ai tlum tlam

Ka dorbar jylla, ka dang don ha ka jingshong dorbar, ha kine ki sngi bad la iohi, ia shibun ki MLA, kiba jop halor ka nongrim bad kiba dei shisha, ki riew donsap ban long ki nong iasaid lane ki nongthaw ain, ba ki la khohreh ban sei, la ki jong ki nia ki jutang ha ka jing iashong dorbar ba nyngkong.

Kane ka pyn iphuh iphieng bad pynphuhmut phuhmat ia ki nongjied bad kumjuh ia u paidlang ka jylla, namar ba ki don ki dkhot kiba tip bniah ia ki jingeh bad ki jingdonkam jong ka thain, ba ki mihkhmat bad ka long kaba i shngain shibun eh, ia ka jingdon jong U bah Ardent Basaiawmoit, Bah Adelbert Nongrum, Bah Charles Marngar, Bah Nujorki Sungoh, Bah Mayraldborn Syiem, Dr Celestine Lyngdoh ba ki la pynkhih win ia ka dorbar jylla, lyngba ki mat bapher jongki.

Hynrei, ka long ruh, kaba i bieit shikatdei, ba ki don pat, sa ki dkhot kiba shu shoh samthiah bad kiba dang ang lyngngoh, haba ki don ha katei ka dorbar bad katei ka pyni shai, ba kitei kim shym la jied, ba kin leit iakren ne leit thaw ain ha katei ka dorbar, hynrei, ki shu shah jied, tang ban mihkhmat bad ban pyni, ba katei Constituency, ka don ia u dkhot jongka, tangba u dei u bym nang kren eiei lane ba ka jaka, kaba u mihkhmat, kam don jingeh eiei satia.

Kam donkam eh, ban iathir nia, halor katei ka mat, namar ba ka jingshisha, ka long, ba kito kiba jop da ka nia ka jutang ha khmat u paidlang jong ka Constituency, kumta hi ki don ia ka nia ka jutang ban leit ia said ha iing dorbar; katba kito kiba shu pynkbum ia ki paidbah, da ka bor jong ka pisa; kumta ruh, ynda poi ha iing dorbar, ialade ruh kim lait ang satia, ka shyntur jongki.
Ka don sa kawei pat ka mat, kaba i bieit shi katdei bad kata ka long ba ki don katto katne ki dkhot, haba ki leit ha iing dorbar, ki shu leit pule notes lane ia ka jingthoh, kaba la dep thoh lypa, da mano re mano bad kane ruh, ka pyni bieit shibun eh, namar ba katei ka pyni, ba kam dei kaba wan na ka jabieng jongki, hynrei, ka dei kaba la shu pynleh lem da kiwei pat.

Kane ka dang dei ka sien nyngkong jong ka iing dorbar bad khlem pep, ka jaitbynriew, kan long kaba donbok shibun eh, lada ki nongthaw ain, kiba ngi la jied, kin sei ia ki mat ki jura, khlem pyndem tdong satia ha kiwei pat.