Mar ia kha, la dawa aadhar ka sorkar

Ha ki khyndiat sngi ba ladep, ka tnat Social Welfare, ka la pynmih khubor, ia ka jingsngewkhia jongka, halor ka jingduh jingiarap ki longkmie kiba armet bad kiba don khun rit, namar ba kim don ia u aadhar number bad katei ka dei ka khubor, kaba da sngew kyndit shi katdei, ba balei ki longkmie, kiba donkam jingiarap, ki dei ban teh ban khum ialade ha uta u aadhar number.

Mynta ka sorkar India, ka la pynrung lut da u aadhar number, ia baroh ki skhim sorkar, naduh u khaw, haduh ka skhim thaw iing, haduh ha ki scholarship jong ki samla pule, nangta mynta sa ha ki skhim jong ki longkmie kiba armet bad wat ia i khunlung, iba dang shu kha.

Kane ka jingleh, ka la nion jubor palat, ia ka hok longbriew, namar ba ha ka jingngeit Khasi jongngi, ka kynthei, ka dei ban don ha ka jinglong jingim, kaba suk ba sain bad kaba lait na ka jingkhuslai jingmut ha ka por ba ka dang armet, hynrei, lada ha katei ka por, phi pynbor ia ka, ban leit shon aadhar, ka paw shai, ba na ka bynta ita i jingbam tei met, phi leh pyrshah ia ka mon jongka.

Nangta sa ia i khun, iba dang shu kha, lane iba dang shibnai, lane shisnem, phi pynbor, ban leit shon aadhar, hynrei, lada ym don aadhar, phin pynduh noh ia ki jingbam ba tei ia ka met jongi ne ia ka kmie jongi, katei ka dei ka jingleh niewbein, kaba palat liam.

Na kaei kaba ngi iohi, haduh mynta, ka long ba ka riti synshar ri, ka ithuh ia u nongthep vote, ynda ula dap 18 snem shaneng, nangta ka ithuh ba kin aplai kam, ynda ki la dap 21 snem shaneng, ka ithuh ba kin ioh bynta, ha ki jingdon jingem bapher, ynda ki la don ha kitei ki rta jinglong samla jongki; hynrei, u aadhar pat, um ap satia, wat tang ia ka jinglong khynnah jongki ruh.

Ka tnat Social Welfare, ka lah ban sngewkmen, na ka bynta ka jingkiew ki nongshon Aadhar, na ka 13 percent sha ka 78.21 percent, hynrei, ka dei ka kamram jong ka sorkar jylla, ba kan iakren mar mar ia ka sorkar India, ba balei, ka kwah ban pyndik haduh katne, ha kaba wat ia i khyllung khynnah, iba dang shu kha bad haduh 6snem, ka rta, la pynbor ba kin shon aadhar bad lada kim don ia utei u number, kin shah pynduh ia ka bam ka dih na katei ka tnat bad kane ka paw, ba kam dei shuh, ka bynta jong ka synshar khadar, hynrei ka dei tang ka jingpynbor ia ki duk ki rangli.