Mano na ki MDC, kiba kwah jop elekshon MLA?

Ka ain kam khang ia U MDC, ba un ialeh MLA, hynrei ka jing ia tip lem, ka dei ban khang pat, ia U MLA, ba un ialeh sa ia ka MDC bad ha kane ka kynti, u paidlang ka Ri Khasi Jaintia, u dei ban shim ia kawei ka mat, kaba kongsan bad kaba shai bha bad kata ka long, ban buh ia kawei ka jingkylli bad kata ka long, la U MDC un dang ialeh MDC biang ne em, ha u 2024, lada jia ba un jop ia ka elekshon MLA 2023.

Katei ka dei ban long ka jing kylli kyllum ia baroh ki MDC, kiba pynkhreh ban iakhun ia ka elekshon MLA 2023, namar, ba lada ym don ba iateh lypa mynta, kin don ki riew khwan lalot bad ki rhah bor, ki ban kam trai, ia ka kam MLA/MDC, kum ka hok nongkynti jongki shimet bad hadien kata, kin sa pynbieit ia u luk u lak, da kaba theh da ka MLA skhim, ba ki paidbah, kin ai jing kyrshan biang, ba kin bat ia ka kam MLA/MDC ha kajuh ka por.

Mynta ka dei ka juk shai bad ka live telecast ia ki jingkren ne jingshim bynta ne jingpoi dorbar jong ki nongmihkhmat bad ki paidbah, ki la suk bha, ban tip ia kaei kaba ki MLA/MDC jongki, ki leh bad kumta, ka dei, ha kaba kum kane ka por, ba kin tian bishar ne ban kylli, ia ki kam, ba ki la trei bad ia ka jingshim bynta jongki, ha ka dorbar KHADC ne ha dorbar jylla ruh bad ka dei ruh, ha katei ka rukom, ba kin bishar, la u ne ka dkhot, ba ki jied, ki la pyndep hok, ne em, ia la ka jong ka bynta, kum u nongmihkhmat bad ka dei ruh ban pynrem, ia kito kiba jied ia u juh u briew, ban long MLA bad MDC, ba ki dang dei pynban, kiba dang sah bieit kum ki jukmaw.

Da ka jingbieit bad lalot pisa jong ki paidbah kaba la jubor, ha kine ki sngi, la iohi, ba ki don shibun ki MLA kiba shim kabu bad tare lut halade, da kaba ki kwah ban long MDC ha kajuh ka por bad nangta, sa shibun ki MDC, kiba leit khroh bad pynbieit briew shawei sha ar bad ynda ki la jop, ki sa leh niewbein, sa ia la ki jong ki briew, kiba la ju jied ia ki, kum ki MDC; katba lada rem pat, kin sa wan phai biang bad pyndem niuhmat ialade, la kum u rang tyrwa, uba shu shah pynbieit ha ki thei sian buit.
Kine ki dei ki sngi, kiba biang tam ia u paidlang ka Ri Khasi, ba un iai kynmaw, ia kawei ka kyntien, kaba ong “sian kum ki bsein, jem nud kum ki paro, ban shida than, ka ban iap”.