Hadien khyndiat sngi, jong ka jingkhlad U Dr Donkupar Roy, ngi iohi, ba ka la sdang mih ka jing iakren, ia u (ki) nongmih bujli, ia utei u nongialam uba la khlad noh.
Kat haduh mynta ngim tip, ia kaei ka jingmut kaba don ha ka liang sorkar, ba la ialam da U Conrad Sangma bad nangta sa ha kawei pat ka liang jong ka seng UDP, ka bym don nongialam (wat la ki don shibun ngut ki symbud nongialam) bad kata ka long, ba kawei ka phang, kan dei halor ka shuki lamphang dorbar, kaba ka kam trai ka seng UDP (wat la lehse, kin don kiba ong ruh ba katei ka dei ka shuki ia u briew, uba la slem ha ka jinglong nongmih khmat bad uba don ka kyrdan pule kaba biang kum U Dr Donkupar) bad nangta, ka wan sa kawei pat ka mat bad kata ka dei ia u nongialam thymmai jong katei ka seng lane U President bad kam kut tang katta, hynrei kaba kham kongsan ka dei ia u nongmih bujli ia U Dr Donkupar na ka shnong trai jongu ka Shella Constituency bad kitei ki lai tylli ki mat, ki dei kiba don ha ka tyrpeng jong ki nong ialam ba mynta jong ka seng UDP lane lehse wat ha ka kynhun synrop jong ka sorkar MDA.
Ngi sngewthuh shai ia mynta, ba wat la ki ummat jong U Conrad Sangma, lane jong U Bah BM Lanong, ki lah ban tuid ha ki ngab jongki, hynrei na kitei lai tylli ki kam, kiba ngi la pyni haneng, ka UDP, MDA, lada ka kwah ban leh burom ia ka iing jong u nongialam ba la khlad, ka lah ban leh eiei tang ia ka Shella Constituency, hynrei ia ar tylli kiwei pat, ka la hap ban iaid shawei pat.
Kumta lada jia ba ka UDP, MDA ki kwah ban leh burom ia katei ka long iing, kin hap ban sei tyngeh ia la ka jong ka syep ka syar, nangne shakhmat, namar ngi la ju iohi, ba elekshon shiteng samoi, ha kine ki sngi, kam ju trei kam shuh lyngba ka lyer jong ka jingsngew lem bad ia kata, ngin hap ban peit shwa ia ka nuksa jong ka Selsella kaba dang shu dep bad nangta ia ka Williamnagar, ha kaba ka seng lane ka iing jong ki kandidet kiba la khlad noh, kam shym trei kam eiei satia bad ka ju long ka rukom, ba kito ki jing iam briew bad ki jingsngew lem, ki ju rngat noh kloi bad mar ia sdang kanbas elekshon, kan sa sdang ka jing ia patar lyngkhot lyngkhai ban ia wan daw wad dong.
Phi don ban ong eiei?