Mano ba nud ban bretia ka politics shadien, buh ia ka jaitbynriew shakhmat?

Ka jingiakren halor ka roster system lane ka reservation policy, ka la wan rah ia ka jyrwit kaba jubor bha ha kine ki sngi hapdeng ki Khasi bad ki Garo bad kaba ima, ka long, ba kane ka ishu, kan lah ban kham palat ia ka jingplie ia ka shnat jong ka MBOSE ha Shillong, ha u snem 2005.

La iohi, ba ki sengbhalang na Khasi, Jaintia hills lem bad ki seng, kiba na Garo hills, ba ki la nang long pynban, ki nongthang nar saw, halor katei ka mat bad katei ka jingleh, kan lah ban pynklang ia ka ding, kaba la sdang pur suki suki, ha kine ki sngi.

Katba ka jia, ngi hap ban shai bha, kum ka jaitbynriew, ba ia ka ishu jong ka roster; ka UDP, kaba don 11ngut ki MLA, kam lah ban leh eiei ruh em, ka VPP kaba don 4ngut ruh kam lah satia bad kaba donkam mynta, ka long, ba ki MLA, kiba dang shu shah jied, kin shim ia kawei ka rai bad kata ka long, la ki kham ieid ia la ka jong ka party ne ki kham ieid ia la ka jong ka jaitbynriew bad hangne, ngin ia peit ia kaei kaba kin buh ha khmat bad lada ki buh ia ka jaitbynriew, ki dei ban lum ban lang ia ki MLA, ban wad lad ban pynbeit ia katei ka kynrum kynram bad ban iakren, da kaba shai ia ki nongialam na Garo hills, ba kynthup ia U Conrad Sangma, myntri rangbah ka jylla.

Kano kano ka jing iakhih, ia kane ka ishu, ha ka kyrteng jong kano kano ka parti, kan shu pyn bijai ei ia ka mat hi baroh kawei, na ka bynta ki san snem ki ban sa wan, namar (kumba la ong haneng), ba kane kam dei ka ishu ban iakren ha surok, ha iew ha hat; hynrei ka donkam ia ka jing ia beit jingmut lang jong ki 36ngut ki MLA na Khasi, Jaintia hills lane ia ki 60ngut hi baroh lang.

Ka jingkylli, hangne, ka wan, ba lada ia ka ishu ILP lane ia ka ishu ktien Khasi, la ia mynjur lang, tang kawei ka sur hapoh ka iing dorbar jylla; kumta, balei ba ngim lah ban iashong lang, ha kawei ka rynsan, ban pynbeit ia kane ka jing iapher jingmut, kaba pyn iashut ia ki ar tylli ki jaitbynriew.
Ngi dei ruh ban sngewthuh, ba katba ngi dang don lang ha kajuh ka tnum iing; ki Khasi, Jaintia lem bad ki Garo, ki hap ban bteng ia ka jingiakren, hapdeng shibun ki jingiapher jingmut, hynrei lada ngi ia pyneh iwei ia iwei, kumta ngi la dei ban ia khlad noh jynduh.