La iathoh shi iathoh, ia shibun ki mat, kiba ktah ia ka bha ka miat jong uba bun balang; hynrei ha kane ka kynti, ka la dei ba ngin ia tynjuh noh ia ka bor jingshemphang hapdeng ki nongjied bad u nongshah jied bad lada jia ba ki paidbah, ki sngew iahap, ka la bha, ba ngin iawer noh, ba ngin ia thaw lem sa mangi, ia ka kynhun Meghalaya Democratic Alliance (MDA), ha kane ka ialeh elekshon MLA 2023.
Lada ki MLA, ki lah ban thaw ia katei ka kynhun, ban pynneh san snem kynthih; te balei, ba mangi pat, ngim lah seh, ban pynneh tang hynriew bnai (naduh mynta haduh ka elekshon 2023)?
Kumba la iakren teng, ka mat kaba kongsan eh, ka long ba ka sorkar MDA, ka da thrang hir hir, ban ioh thaw sorkar biang, ha u snem 2023; hynrei kumno sha, yn thaw sorkar biang, haba ha Secre teriat, ki iadoh ki iakdup para ma ki, katba tang shu mih sha madan, ki ia kynshu, ki ia pynat bad ki ia kawang ktieh bad ki pyn iashoh ia dat, pyn iajot ia ki shnong ki thaw, ki iing ki sem bad wat shikhun shitnga ruh kumjuh.
Lada u paidlang ka jylla, u sngew bit ia katei ka mat, ka la dei ban don ka jingsdang na Consti tuency U Conrad Sangma, U bah Metbah Lyngdoh, U bah Prestone Tynsong bad kata ka long, ban thaw ia ka kynhun MDA bad ban pynmih, da uwei u kyrtong ionglang, ban iakhun ha ka elekshon 2023 bad ban ai nuksa, ba ha ka Constituency jong u MLA NPP, ka dei ban ialeh tang ka NPP, katba kiwei ki kynhun MDA, ki dei ban ia khylliap lama lut noh, ha kiba kum kitei ki Constituency.
Ngi la dep iakren ruh, ha kane ka peij, ba ka jing iateh paralok ha ki seng heh ha Delhi, ka dei ha katei ka dur, ba ha ka UPA, kaba ialam da ka Congress, kam ju iakhun pyrshah ia ki paralok jongka, ha kajuh ka Constituency bad ka NDA, kaba ialam da ka BJP, ka leh ha katei hi ka dur; katba hangne pat ialeh buit tuh bad ia sop sop tang shajrong, katba sha madan ki pyniashoh ki pyn iashrut ia ki nongthep vote.
Katba ki nongialam jong ki seng bapher, ki iakren, hynrei ngim lah lait na ka sorkar synrop, ha u snem 2023 bad haba kumta, ka bha ban sdang lypa na ki Constituency, sa bud ha dorbar jylla.
Phi don ban ong eiei?